குடியிருப்பு பகுதிக்குள் புகுந்த நாகப்பாம்பை பிடித்த மகிழ்ச்சியில் அதற்கு முத்தம் கொடுக்க முயன்ற பாம்பு பிடி வீரரின் உதட்டில் பாம்பு கொத்தியதில் அவர் மருத்துவமனையில் அனுமதிக்கப்பட்டுள்ளார்.
கர்நாடக மாநிலம் ஷிவமொகாவின் அருகே உள்ள குடியிருப்பு பகுதியில் நாகப்பாம்பு ஒன்று புகுந்துள்ளது. இது குறித்து அப்பகுதி மக்கள் பாம்பு பிடிக்கும் நபருக்கு தகவல் தெரிவித்துள்ளனர். அவர் வருவதற்குள், அந்த பாம்பு அங்கிருந்த புதருக்குள் சென்று மறைந்தது.
இதையடுத்து அங்கு வந்த பாம்பு பிடி வீரர், ஒருவழியாக பாம்பை பிடித்துள்ளார். அத்துடன், பிடித்த பாம்புக்கு அவர் முத்தம் கொடுக்க முயற்சி செய்தார். அப்போது, ஆக்ரோஷமாக இருந்த அந்த பாம்பு அவரது உதட்டில் கொத்தியது.
இதனால் அலறி துடித்த அவரை அங்கிருந்தவர்கள் மீட்டு தனியார் மருத்துவமனையில் அனுமதித்தனர். அங்கு, அவருக்கு தீவிர சிகிச்சை அளிக்கப்பட்டு வருகிறது. இது தொடர்பான வீடியோ காட்சிகள் சமூக வலைதளங்களில் வைரலாகி வருகிறது.