குஜராத்தில் ஆட்சி அமைக்கப் போவது யார்? -காங்கிரஸ், ஆம் ஆத்மிக்கு ஷாக் கொடுத்த கருத்துக்கணிப்பு!

குஜராத் ,ஹிமாச்சல் பிரதேசம் ஆகிய மாநிலங்களின் சட்டப்பேரவைகளுக்கு இந்த ஆண்டு இறுதியில் பொதுத் தேர்தல் நடைபெற உள்ளது. தேர்தல் தேதியை ஆணையம் விரைவில் அறிவிக்கும் என்று எதிர்பார்க்கப்படும் நிலையில், இத்த தேர்தலில் எந்த கட்சி வெற்றி பெறும் என்பது குறித்த தேர்தலுக்கு முந்தைய கருத்துக் கணிப்பு தற்போது வெளியாகி உள்ளது.

ஏபிபி சி வோட்டர் நடத்திய கருத்து கணிப்பில், ‘குஜராத் மாநிலத்தில் தற்போது ஆட்சியில் உள்ள பாஜகவே தனிப்பெரும்பான்மையுடன் ஆட்சி அமைக்கும். அதாவது தற்போது ஆளுங்கட்சியான பாஜகவுக்கு 99 -143 இடங்கள் வரை கைப்பற்றி அமோக வெற்றி பெறும்.

அங்கு தற்போது 77 எம்எல்ஏக்களுடன் வலுவான எதிர்க்கட்சியாக உள்ள
காங்கிரஸ்
விரைவில் நடைபெற்ற உள்ள தேர்தலில் 35 -45 இடங்களில் மட்டும் வெற்றிப் பெறும். மும்முனை போட்டியை தரும் என எதிர்பார்க்கப்படும் ஆம் ஆத்மி, அந்த அளவுக்கு டஃப் கொடுக்காது எனவும், அந்த கட்சி ஓரிரு இடங்களில் வெற்றி பெற்றாலே பெரிய விஷயம்’ என்று கருத்துக்கணிப்பில் தெரிவிக்கப்பட்டுள்ளது.

வாக்கு சதவீதத்தை பொறுத்தவரை ஆளும் பாஜகவின் வாக்கு விகிதம் 49% இல் இருந்து 46 ஆகவும், காங்கிரஸ் கட்சியின் வாக்கு சதவீதம் 41% இல் இருந்து 32% ஆகவும் குறையும் எனவும் சி வோட்டர் தெரிவித்துள்ளது. அதேசமயம் ஆம் ஆத்மி 17 சதவீதம் வரை வாக்குகளை பெறும் என்றும் கருத்துக்கணிப்பில் கூறப்பட்டுள்ளது.

இதேபோன்று, ஹிமாச்சல பிரதேசத்தில் மொத்தமுள்ள 68 சட்டமன்ற தொகுதிகளில் ஆளும் பாஜக 37 -45 இடங்களை கைப்பற்றி மீண்டும் ஆட்சி அமைக்கும் எனவும், காங்கிரஸ் 21 -29 இடங்களை கைப்பற்றும் என்றும் ஏபிபி சி வோட்டர் தெரிவித்துள்ளது. ஆம் ஆத்மியை பொறுத்தவரை 10 சதவீதம் வாக்குகளை பெறும் என்றாலும் எந்த தொகுதியிலும் வெற்றிப் பெற வாய்ப்பில்லை எனவும் கருத்துக்கணிப்பு கூறியுள்ளது.