அருணாசலப் பிரதேசத்தில், இந்திய ராணுவத்தின் ஹெலிகாப்டர் ஒன்று விபத்துக்குள்ளானதில் விமானி ஒருவர் உயிரிழந்தார். படுகாயமடைந்த மற்றொரு விமானி சிகிச்சை பெற்று வருகிறார்.
அருணாச்சலப் பிரதேசத்தில் உள்ள தவாங் பகுதியில் இன்று காலை 10 மணியளவில் வழக்கமான பயணம் மேற்கொண்டிருந்த இந்திய ராணுவத்தின் சீட்டா ஹெலிகாப்டர் ஒன்று விபத்துக்குள்ளானது. இந்த விபத்தில், ஹெலிகாப்டரில் இருந்ந்த இரண்டு விமானிகளும் காயமடைந்தனர்.
தகவல் அறிந்து விரைந்து வந்த ராணுவ வீரர்கள் இரண்டு விமானிகளையும் மீட்டு அருகில் உள்ள ராணுவ மருத்துவமனைக்கு கொண்டு சென்றனர். இதில், பலத்த காயமடைந்த விமானிகளில் ஒருவரான லெப்டினன்ட் கர்னல் சவுரப் யாதவ் சிகிச்சை பலனின்றி உயிரிழந்தார்.
மற்றொரு விமானி மருத்துவமனையில் சிகிச்சை பெற்று வருகிறார். இந்த விபத்துக்கான காரணம் குறித்து உடனடியாக தெரியவில்லை என்றும், விவரங்கள் கண்டறியப்பட்டு வருகின்றன என்றும் ராணுவ அதிகாரிகள் தெரிவித்துள்ளனர்.