மேற்கு ஆப்பிரிக்க நாடான காம்பியாவில் 66 குழந்தைகள் சிறுநீரக செயலிழப்பு காரணமாக உயிரிழந்தனர். இதற்கு இந்தியாவில் தயாரிக்கப்பட்ட தரமற்ற 4 இருமல் மருந்துகள் காரணமாக இருக்கலாம் என்று உலக சுகாதார அமைப்பு எச்சரிக்கை விடுத்துள்ளது.
காம்பியா நாட்டில் ஏற்பட்ட சிறுநீரக பாதிப்பு மற்றும் 66 குழந்தைகளின் உயிரிழப்பிற்கும் இந்த 4 மருந்துகளுக்கும் தொடர்பிருக்கலாம் என உலக சுகாதார அமைப்பின் தலைவர் டெட்ரோஸ் அதானோம் தெரிவித்துள்ளார்.
இது தொடர்பாக உலக சுகாதார நிறுவனம் வெளியிட்டுள்ள செய்திக்குறிப்பில், “இந்தியாவில் உள்ள மெய்டன் பார்மாசூட்டிக்கல்ஸ் என்ற மருந்து நிறுவனத்தால் இருமல் மற்றும் சளி மருந்துகள் தயாரிக்கப்படுகின்றன. காம்பியா நாட்டில் ஏற்பட்ட சிறுநீரக பாதிப்பு மற்றும் 66க்கும் மேற்பட்ட குழந்தைகளின் உயிரிழப்புக்கு இந்த நிறுவனத்தின் 4 மருந்துகளுடனான தொடர்பு கண்டறியப்பட்டுள்ளது. நச்சுத்தன்மை கொண்ட இந்த இருமல் மருந்துகளுக்கு எச்சரிக்கை விடுக்கப்பட்டுள்ளது. இது குறித்து விசாரணை நடைபெற்று வருகிறது. எனவே, மெய்டன் பார்மாசூட்டிக்கல்ஸ் என்ற இந்திய நிறுவனத்தால் தயாரிக்கப்பட்ட 4 இருமல், சளி மருந்துகளை பயன்படுத்த வேண்டாம்.” என தெரிவிக்கப்பட்டுள்ளது.
மேற்கு ஆப்பிரிக்க நாடுகளுக்கு வெளியிலும் இந்த மருந்துகள் விநியோகம் செய்யப்பட்டிருக்கலாம் என சுட்டிக்காட்டியுள்ள உலக சுகாதார அமைப்பு, அந்த நிறுவனத்தின் Promethazine Oral Solution, Kofexmalin Baby Cough Syrup, Makoff Baby Cough Syrup, Magrip N Cold Syrup ஆகிய மருந்துகளை அனைத்து நாடுகளும் பயன்பாட்டில் இருந்து அகற்றுமாறு கேட்டுக் கொண்டுள்ளது. இந்த நான்கு இருமல் மருந்துகளை குழந்தைகளுக்கு கொடுப்பது மிகவும் ஆபத்து என்றும் உலக சுகாதார அமைப்பு எச்சரிக்கை விடுத்துள்ளது.
இதுகுறித்து மத்திய சுகாதாரம் மற்றும் குடும்ப நல அமைச்சகத்தின் உயர்மட்ட வட்டாரங்கள் கூறுகையில், “கடந்த செப்டம்பர் 29ஆம் தேதி இருமல் மருந்துகள் குறித்து இந்திய மருந்துக் கட்டுப்பாட்டாளர் ஜெனரலுக்கு (DCGI) உலக சுகாதார அமைப்பு எச்சரிக்கை விடுத்தது. இந்த விவகாரத்தை உடனடியாக கையில் எடுத்த மத்திய மருந்துகள் தரநிலைக் கட்டுப்பாட்டு அமைப்பு, மெய்டன் பார்மாசூட்டிக்கல்ஸ் ஹரியானாவை சேர்ந்த நிறுவனம் என்பதால், ஹரியானா ஒழுங்குமுறை ஆணையத்திடம் இதுதொடர்பாக விளக்கம் கேட்டுள்ளது.” என தெரிவித்துள்ள.