அதிமுகவில் பிரச்சினை ஓய்ந்துவிட்டதா? இப்ப யாரு? எடப்பாடி தானா? ஓபிஎஸ் அவ்வளவு தானா? என்று சாமானியர்களும் கேட்கும் அளவிற்கு வந்துவிட்டது கட்சி விவகாரம். தங்கள் வீட்டு பிரச்சினைகளை கூட மறந்து விட்டு, அதிமுகவில் என்ன நடந்து கொண்டிருக்கிறது என்று மணிக்கு ஒருமுறை அப்டேட் செய்து வருகின்றனர். அதற்கு சற்று சளைக்காமல் பல்வேறு விஷயங்கள் அரசியல் ரீதியாக அரங்கேறி கொண்டிருக்கின்றன. இன்றும் அப்படித்தான். தனது சொந்த ஊரான எடப்பாடிக்கு சென்றிருக்கிறார் அதிமுக இடைக்கால பொதுச் செயலாளர்
.
அங்கு கட்சியினர் சிலருடன் ஆலோசனை நடத்தினார். இதையடுத்து மாலை 4 மணியளவில் மாற்று கட்சிகளை சேர்ந்தவர்கள் அதிமுகவில் இணைய வந்திருந்தனர். இந்த விஷயம் ஏற்கனவே திட்டமிட்டிருந்தது. அதன்படி, எடப்பாடி பயணியர் மாளிகையில் நடந்த நிகழ்ச்சியில் திமுகவை சேர்ந்த 13வது ஒன்றிய கவுன்சிலர் வேட்பாளர் கோமதி, அண்ணா நகர் கிளைச் செயலாளர் சங்கர்,
அண்ணா நகர் கிளை தலைவர் அன்பு, அண்ணா நகர் இளைஞர் அணி துணை அமைப்பாளர் ஸ்டாலின், வார்டு செயற்குழு உறுப்பினர்கள் சேகர், தங்கம், சக்திவேல், 13 வது வார்டு பிரதிநிதி பாலு, 27 வது வார்டு பிரதிநிதி மாது, பெரிய நாச்சியனூர் பிரதிநிதி சக்திவேல், 12 வது வார்டு பிரதிநிதி விசுவநாதன், 30வது வார்டு முன்னாள் கவுன்சிலர் பழனியம்மாள் உள்ளிட்ட 50க்கும் மேற்பட்ட நிர்வாகிகள் கலந்து கொண்டனர்.
ஒட்டுமொத்தமாக 300க்கும் மேற்பட்டோர் திமுகவில் இருந்து விலகி இன்றைய தினம் எடப்பாடி பழனிசாமி முன்னிலையில் அதிமுக இணைந்ததாக சொல்லப்படுகிறது. அவர்களுக்கு அதிமுகவின் துண்டு அணிவித்து வரவேற்று வாழ்த்து தெரிவிக்கப்பட்டது. அப்போது கழக அமைப்பு செயலாளர் செம்மலை, மாநிலங்களவை உறுப்பினர் சந்திரசேகரன்,
எடப்பாடி நகரக் கழக செயலாளர் முருகன் மற்றும் நிர்வாகிகள் உடனிருந்தனர். எடப்பாடியில் கடந்த சில மாதங்களுக்கு முன்பு நடந்த உள்ளாட்சி தேர்தலில் திமுகவின் கை ஓங்கியது. இது எடப்பாடி தரப்பிற்கு பின்னடைவாக பார்க்கப்பட்ட நிலையில், ஆளுங்கட்சியில் இருந்து ஒரு பெரிய படையை கொண்டு வந்து அதிமுகவில் இணைத்திருக்கின்றனர்.
இந்த விஷயத்தை சமூக வலைதளங்களில் பெருமிதத்துடன் அதிமுகவின் ரத்தத்தின் ரத்தங்கள் கொண்டாடி வருகின்றனர். எவ்வளவு தான் சலசலப்பு நீடித்தாலும் கட்சியை பலப்படுத்துவதில் சிறிதும் குறை வைத்து விடக் கூடாது என்று மிகவும் கவனமாக செயல்பட்டு வருகிறார் எடப்பாடி பழனிசாமி. ஓரிரு நாட்கள் எடப்பாடியில் இருந்து விட்டு, மீண்டும் தனது சுற்றுப் பயணத்தை தொடங்குவார் எனக் கூறப்படுகிறது.