விருதுநகர் பாராளுமன்ற உறுப்பினர் அலுவலகத்தில் அகில இந்திய காங்கிரஸ் கமிட்டி பொதுச் செயலாளர் மாணிக்கம் தாகூர் M.P., செய்தியாளர்களை சந்தித்தார். அப்போது பேசிய அவர்; தீபாவளி நெருங்கி வரும் சூழ்நிலையில் டெல்லி மாநிலத்தில் பட்டாசு வெடிக்க தடை விதித்ததை தொடர்ந்து பிற மாநிலங்களில் தடை விதிப்பதற்கு முன்னர், பட்டாசு தொழிலை பாதுகாக்கும் வண்ணம் தமிழக முதல்வர் ஸ்டாலின் அனைத்து மாநில முதல்வர்களுக்கும் கடிதம் எழுத வேண்டும்.
அதற்காக காங்கிரஸ் கட்சி சார்பில் முதல்வரை சந்தித்து கடிதம் அளிக்க உள்ளதாகவும், கூடுதல் முயற்சியாக சிவகாசி சட்டமன்ற உறுப்பினர் அசோகன் தலைமையில் ஒரு குழு அமைக்கப்பட்டு உள்ளதாகவும், அந்த குழு அனைத்து மாநில முதல்வர்களையும் சந்தித்து தீபாவளிக்கு பசுமை பட்டாசு வெடிக்க தடை விதிக்கக்கூடாது என்றும், விருதுநகர் மாவட்டத்தின் வாழ்வாதாரமாக விளங்கும் பட்டாசு தொழிலை பாதுகாக்க ஒத்துழைக்க வேண்டும் என அக்குழு வலியுறுத்தும் என்றார்.
சமுதாய வளைகாப்பு விழாவில் தொழில்துறை அமைச்சர் தங்கம் தென்னரசு பேச்சு
பட்டாசு விவகாரத்தில் பாஜக அரசு இரட்டை வேடம் போடுவதாக குற்றம்சாட்டினார். மேலும் பேசிய அவர் பட்டாசு தொழிலை பாஜகவினர் தீண்டத்தகாத தொழிலாக பார்க்கின்றனர் என குற்றம்சாட்டினார். காங்கிரஸ் கட்சியை பொறுத்தவரை இந்தியாவில் 9 ஆயிரம் பொதுக்குழு உறுப்பினர்கள் உள்ளதாகவும், ஜனநாயக முறையில் வாக்கு சீட்டு வைத்து பெட்டி வைத்துத்தான் தேர்தல் நடத்தப்படும் என்றும் தெரிவித்தார்.
பிஜேபியில் இது போன்ற தேர்தல் முறை இல்லை. அக்கட்சியில் ஜனநாயகமும் இல்லை என்றார். ராகுல் காந்தியின் நடைபயணம் 2024 நாடாளுமன்ற பொதுத்தேர்தலில் மிகப்பெரிய மாற்றத்தை ஏற்படுத்தும் என்றார்.
மதுரை எய்ம்ஸ் மருத்துவமனை குறித்து தமிழகத்திற்கு வந்திருந்த பிஜேபி தலைவர் ஜே.பி.நட்டா 95 சதவிகித பணிகள் நடந்து முடிந்துவிட்டதாக பொய் சொல்கிறார். அதற்கு முன்னாள் அதிமுக அமைச்சர் உதயகுமார் வக்காலத்து வாங்குகிறார். பூர்வாங்க பணிகள் கூட இன்னும் முழுமையாக முடியவில்லை என்றார்.
தான் தெலுங்கானா காங்கிரஸ் கட்சிக்கு தேர்தல் பொறுப்பாளராக உள்ள காரணத்தால், சந்திரசேகர ராவ் புதிய தேசிய கட்சி ஆரம்பித்துள்ளதை பார்க்கும் போது ஜோதிடத்தில் நம்பிக்கை கொண்டு கட்சிக்கு பெயர் மாற்றம் செய்துள்ளார் அவ்வளவு தான்.
இதனால் தெலுங்கானாவில் வேறு எந்த மாற்றமும் நிகழப்போவதில்லை என்றார். மேலும் இந்த நிகழ்வின்போது சிவஞான புரம் ஊராட்சி மன்ற தலைவர் கிருஷ்ணமூர்த்தி மற்றும் காங்கிரஸ் கழக நிர்வாகிகள் உடனிருந்தனர்.