அரசு மருத்துவமனைகளில் மக்களுக்கு தேவையான மருந்துகள் இருப்பில் இல்லை என்ற குற்றச்சாட்டு கடந்த சில தினங்களாக எழுந்த வண்ணம் உள்ளன. மேலும் மக்களைத் தேடி மருத்துவம் திட்டத்திற்கும் தேவையான மருந்துகள் இருப்பில் இல்லை எனவும் குற்றச்சாட்டு வைக்கப்பட்டு வந்தது.
இந்த நிலையில், தமிழ்நாட்டில் மருந்துத் தட்டுப்பாடு இல்லை எனவும், மருத்துவமனைகளில் மருந்து இல்லை என்றால் புகார் கொடுக்கலாம் எனவும் அமைச்சர் மா.சுப்பிரமணியன் தெரிவித்துள்ளார்.
சென்னை பெருநகர காவல் துறை மற்றும் சென்னை மருத்துவக் கல்லூரி சார்பில் போதையில்லா தமிழ்நாட்டை உருவாக்கும் வகையில் விழிப்புணர்வு மாரத்தான் நடத்தப்பட்டது. ராஜீவ்காந்தி அரசு பொது மருத்துவமனை வளாகத்தில் இந்த விழிப்புணர்வு மினி மராத்தானை மருத்துவம் மற்றும் மக்கள் நல்வாழ்வுத் துறை அமைச்சர் மா.சுப்பிரமணியன் தொடங்கி வைத்தார்.
அதன்பிறகு செய்தியாளர்களை சந்தித்த அவர், தமிழ்நாட்டில் போதை பொருள் பயன்பாடு குறைந்துள்ளது. தமிழ்நாட்டில் கஞ்சா பயிரிடுதல் முற்றிலும் ஒழிக்கப்பட்டுள்ளது. அண்டை மாநிலங்களிருந்து கஞ்சா கடத்தி வரப்படுகிறது என்றார்.
தொடர்ந்து மருந்து தட்டுப்பாடு குறித்து பேசிய அமைச்சர் மா.சுப்பிரமணியன், தமிழ்நாட்டில் மருந்துத் தட்டுப்பாடு என்பது போன்ற தோற்றம் ஏற்படுத்தப்பட்டு வருகிறது. மருத்துவமனைகளில் மருந்து இல்லை என்றால் 104 என்ற எண்ணில் தொடர்பு கொண்டு புகார் கொடுக்கலாம். புகாரின் பேரில் உடனடியாக நடவடிக்கை எடுக்கப்படும் என்றார்.