மகாராஷ்டிர அரசியலில் ஆளுங்கட்சியாக உள்ள சிவசேனாவிற்கு தீராத சோதனை காலம். பால் தாக்கரே தொடங்கி வைத்து இந்துத்துவா கொள்கையை தூக்கி பிடித்து வளர்ந்த கட்சி தற்போது யாருக்கு சொந்தம் என்ற கேள்விக்கு விடை தெரியாமல் நிற்கிறது. ஏக்நாத் ஷிண்டே தலைமையிலான சிவசேனா ஆதரவாளர்களுடன் பிரிந்து சென்று பாஜக உடன் கைகோர்த்து முதல்வர் நாற்காலியில் அமர்ந்து கொண்டது. உத்தவ் தாக்கரே தலைமையிலான சிவசேனா எதிர்க்கட்சி போல ஓரங்கட்டப்பட்டு விட்டது. கட்சி தங்களுக்கு தான் என இருதரப்பினரும் மாறி மாறி போட்டி போட்டுக் கொண்டிருக்கின்றனர்.
இந்த சூழலில் அந்தேரி தொகுதி இடைத்தேர்தல் தேதி வரும் நவம்பர் 3ஆம் தேதி நடைபெறும் என்று அறிவிக்கப்பட, சிவசேனாவின் வில் அம்பு சின்னத்தை முடக்கி தேர்தல் ஆணையம் அறிவித்துவிட்டது. அதுமட்டுமின்றி கட்சி பெயரையும் முடக்கியது. இதனால் இருதரப்பும் புதிதாக ஒரு சின்னத்தில் மற்றும் கட்சி பெயரில் நின்று வெற்றி பெற வேண்டிய கட்டாயம் நிலவுகிறது. சிவாஜி பார்க் தசரா பேரணி போல் அந்தேரி தொகுதி இடைத்தேர்தல் வெற்றியும் மிகவும் முக்கியமானது.
இதன்மூலமே உண்மையான சிவசேனா யார்? என்பதை மக்கள் மன்றத்தில் நிரூபிக்க முடியும். இந்நிலையில் உத்தவ் தாக்கரே தரப்பு கட்சிக்காக மூன்று பெயர்களையும், மூன்று சின்னங்களையும் தேர்வு செய்து தேர்தல் ஆணையத்திற்கு அனுப்பி வைக்கவுள்ளது. இதற்காக நாளை பிற்பகல் 2 மணி வரை அவகாசம் அளிக்கப்பட்டுள்ளது. அதன்படி, சிவசேனா பாலாசாகேப் தாக்கரே, சிவசேனா பிரபோதநாகர் தாக்கரே, சிவசேனா உத்தவ் பாலாசாகேப் தாக்கரே என கட்சி என்ற அடையாளத்திற்காக மூன்று பெயர்கள் பரிந்துரை செய்யப்பட்டுள்ளன.
குறிப்பாக பாலாசாகேப் தாக்கரே என்ற பெயரை இருதரப்பும் கேட்பதால் அதையும் தேர்தல் ஆணையம் முடக்கி விடும் என்று சொல்லப்படுகிறது. இதையடுத்து திரிசூலம், உதயசூரியன், டார்ச் ஆகிய மூன்று சின்னங்களில் ஒன்றை ஒதுக்க வேண்டும் என்று தேர்தல் ஆணையத்திடம் கேட்கப்பட்டுள்ளது. இதில் கவனிக்க வேண்டிய அம்சம் என்னவென்றால் உதயசூரியன்.
இந்த பெயரை கேட்டாலே தமிழகத்தில் ஆளுங்கட்சியாக இருக்கும் திமுகவின் சின்னம் அல்லவா? என்று தான் பலரும் நினைப்பர். ஆம் தமிழகத்தில் உதயசூரியன் சின்னத்தை யாராலும் கேட்க முடியாது. ஆனால் வேறொரு மாநிலத்தில் கேட்க மற்றும் போட்டியிட தேர்தல் ஆணையம் அனுமதி அளிக்கிறது. ஏற்கனவே சிவசேனாவின் சின்னமான வில் அம்பு சின்னத்தை வேறொரு வண்ணத்தில் வேறொரு மாநிலத்தில் ஜார்க்கண்ட் முக்தி மோர்ச்சா பயன்படுத்தி வருகிறது.
இதேபோல் சமாஜ்வாதி, ஜம்மு காஷ்மீர் பாந்தர்ஸ் கட்சி ஆகியவை சைக்கிள் சின்னத்தை பயன்படுத்தி வருகின்றன. அந்த வகையில் சிவசேனாவிற்கு உதய சூரியன் கிடைக்குமா? இல்லையெனில் திரிசூலம் கிடைக்குமா? என்ற எதிர்பார்ப்பு ஏற்பட்டுள்ளது. இருப்பினும் இது தற்காலிக ஏற்பாடு மட்டுமே. கட்சி யாருக்கு என்பது உறுதி செய்யப்பட்ட உடன் வில் அம்பு சின்னம் அவர்கள் கைகளுக்கு கிடைத்துவிடும்.