பிகார் மாநில அரசியல் தேசிய அளவில் கவனம் பெறும் வகையில் மாறியிருக்கிறது. அதற்கு முக்கிய காரணம் பிரசாந்த் கிஷோரின் ஜன் சூரஜ் யாத்ரா. பிகார் மாநிலத்தை வேற லெவலுக்கு கொண்டு செல்வது தான், தன்னுடைய இலக்கு என்றும், அதற்காக 3,500 கிலோமீட்டர் தூரத்திற்கு நடைபயணம் செய்து மக்களை சந்தித்து புதிய வியூகம் வகுக்கவுள்ளதாகவும் தெரிவித்துள்ளார். ஏற்கனவே முதல்வர் நிதிஷ் குமார், தேஜஸ்வி யாதவ், அமித் ஷா, சஞ்சய் ஜெய்ஸ்வால் ஆகியோரால் அரசியல் களம் சூடுபிடித்துள்ள நிலையில், பிரசாந்த் கிஷோரின் வருகை அடுத்தகட்டத்திற்கு கொண்டு சென்றுள்ளது.
குறிப்பாக பிரசாந்த் கிஷோரின் நடைபயணத்தை ஆளும் ஐக்கிய ஜனதா தளக் கட்சியினர் மாறி, மாறி விமர்சனம் செய்து வருகின்றனர். முதல்வரும், ஐக்கிய ஜனதா தளக் கட்சி தலைவருமான நிதிஷ் குமார் பேசுகையில், பிரசாந்த் கிஷோர் பாஜகவின் ஏஜெண்டாக, அவர்களது திட்டங்களை அடுத்தகட்டத்திற்கு கொண்டு செல்வதற்காக தான் வேலை செய்வதாக குற்றம்சாட்டினார்.
இந்த விஷயம் கோபத்தை ஏற்படுத்த பிரசாந்த் கிஷோர் பதிலடி கொடுத்தார். ஐக்கிய ஜனதா தளத்திற்கு தலைமை பொறுப்பேற்க வேண்டும் என்று சமீபத்தில் அழைத்தனர். ஆனால் முதல்வர் பதவியே கொடுத்தாலும் நான் வர மாட்டேன் என்று திட்டவட்டமாக தெரிவித்துவிட்டதாக கூறினார். ஆனால் நிதிஷ் குமார் இதனை மறுத்துள்ளார். பொய்யான தகவல்களை பிரசாந்த் கிஷோர் தெரிவிக்கிறார்.
அவர் தான் ஐக்கிய ஜனதா தளத்தை
காங்கிரஸ்
கட்சியுடன் இணைத்து விடலாம் என்று கேட்டதாக பரபரப்பை கொளுத்திப் போட்டார். அவருடன் எங்களுக்கு எந்தவொரு தொடர்பும் கிடையாது. அவரைப் பற்றி தற்போது தான் நன்கு புரிந்து கொண்டோம். ஏற்கனவே டெல்லி மற்றும் பாட்னாவில் தெளிவாக கூறிவ்ட்டேன். அதன்பிறகு அவரைப் பற்றி பேச வேண்டிய தேவை என்ன இருக்கிறது? என்று அதிரடியாக கேள்வி எழுப்பினார்.
இந்நிலையில் முதல்வர் நிதிஷ் குமாருக்கு பதிலடி கொடுக்கும் வகையில் பேசிய பிரசாந்த் கிஷோர், நிதிஷ் குமாருக்கு வயது ஆகிவிட்டது அல்லவா? அதனால் தான் பேச வந்ததை விட்டு விட்டு, வேறு எதை எதையோ பேசிக் கொண்டிருக்கிறார். நான் பாஜகவிற்காக வேலை செய்கிறேன் என்று வைத்துக் கொண்டால், எதற்காக காங்கிரஸ் கட்சியை வலுப்படுத்துவதை பற்றி பேச வேண்டும்.
அதற்காக ஏன் கவலைப்பட வேண்டும். நிதிஷ் குமாரை சுற்றி நம்பிக்கையில்லா நபர்கள் தான் இருக்கின்றனர். அதனால் அவர் பயத்தில் உள்ளார். அதனால் தான் உளறுவது போல் பேசி வருகிறார். அதுமட்டுமின்றி அரசியல் ரீதியாக தனிமைப்படுத்தப்பட்டிருப்பதாக பிரசாந்த் கிஷோர் தெரிவித்துள்ளார்.