கருப்புப்பணம் மற்றும் கள்ள நோட்டுகளை ஒழிக்கும் நடவடிக்கை என ரூ.500, 1000 நோட்டுகளை செல்லாது என கடந்த 2016ஆம் ஆண்டு நவம்பர் 8ஆம் தேதியன்று மத்திய அரசு அறிவித்தது. அதேசமயம், புதிய ரூ.500 மற்றும் ரூ.2000 நோட்டுகளையும் மத்திய அரசு வெளியிட்டது.
நாடு முழுவதும் மிகப்பெரிய அதிர்வலைகளை ஏற்படுத்திய
பணமதிப்பிழப்பு
நடவடிக்கையால் சுமார் 3 மாதங்களுக்கும் மேலாக பொதுமக்கள் பணமின்றி தவித்தனர். ஏடிஎம் வாசல்களில் மணிக்கணக்கில் பலர் காத்திருந்தனர். சில இடங்களில் உயிரிழப்புகளும் ஏற்பட்டன. ஆனால், பணமதிப்பிழப்பு நடவடிக்கையால் கருப்புப் பணம் ஒழிக்கப்படுவதோடு, கள்ளநோட்டு புழக்கமும் தடுக்கப்படும் என்ற பிரதமர், பயங்கரவாதிகளுக்கு பணம் செல்லுவது தடுக்கப்படுவதோடு இந்திய பொருளாதாரமும் உயர்த்தப்படும் என்றார்.
மத்திய அரசின் பணமதிப்பிழப்பு நடவடிக்கைக்கு ஒரு சாரார் வரவேற்பு தெரிவித்தாலும், இன்றளவும் பலரும் தங்களது எதிர்ப்புகளை பதிவு செய்து வருகின்றனர். பணமதிப்பிழப்பு அறிவிக்கப்பட்ட நாளை கருப்பு நாளாக பெரும்பாலான எதிர் கட்சிகள் அனுசரிக்கின்றன. ஆனால், பாஜகவினர் மட்டும் இந்த திட்டத்தை கொண்டாடி வருகின்றனர்.
இதனிடையே, மத்திய பாஜக அரசின் பணமதிப்பிழப்பு நடவடிக்கைக்கு எதிராக உச்ச நீதிமன்றத்தில் வழக்குகள் தொடரப்பட்டன. உச்ச நீதிமன்ற நீதிபதிகள் எஸ்.அப்துல் நசீர், பி.ஆர்.கவை, ஏ.எஸ்.போபண்ணா, வி.ராமசுப்ரமணியன், பி.வி.நாகரத்னா ஆகியோர் அடங்கிய அரசியல் சாசன அமர்வு, பணமதிப்புழப்புக்கு எதிராக தொடரப்பட்ட 58 மனுக்களை விசாரித்து வருகிறது. இந்த வழக்கு தொடர்பான விசாரணை இன்று நடத்தப்படும் என தெரிவிக்கப்பட்டது.
அதன்படி, உச்ச நீதிமன்ற அரசியல் சாசன அமர்வில் பணமதிப்பிழப்பு நடவடிக்கைக்கு எதிராக தொடரப்பட்ட மனுக்கள் மீதான விசாரணை இன்று நடைபெற்றது. அப்போது, ஒரு குறிப்பிட்ட தொடரின் கரன்சி நோட்டுகளை மட்டுமே ரத்து செய்ய பிரிவு 26(2) மத்திய அரசுக்கு அதிகாரம் அளிப்பதாகவும், நாட்டின் ஒட்டுமொத்த ரூபாய் நோட்டுகளையும் ரத்து செய்ய அதிகாரம் அளிக்கவில்லை எனவும் மனுதாரர்கள் தரப்பில் வாதிடப்பட்டது.
இதையடுத்து, அனைத்து 500, 1000 ரூபாய் நோட்டுகளை பணமதிப்பிழப்பு செய்ய ரிசர்வ் வங்கி சட்டத்தின் 26(2)ஆவது பிரிவின் கீழ் மத்திய அரசுக்கு அதிகாரம் உள்ளதா என்பதும், பணமதிப்பிழப்பு செய்ய பின்பற்றப்பட்ட வழிமுறைகள் நியாயமானதா என்பதும் முக்கிய கேள்வி. அதை விசாரிக்க வேண்டியுள்ளது என உச்ச நீதிமன்றம் தெரிவித்தது.
மேலும், பணமதிப்பிழப்பு நடவடிக்கைக்கு எதிரான வழக்கில் விரிவான பிரமாண பாத்திரம் தாக்கல் செய்ய மத்திய அரசுக்கும், ரிசர்வ் வங்கிக்கும் உச்ச நீதிமன்ற அரசியல் சாசன அமர்வு உத்தரவிட்டுள்ளது. பணமதிப்பிழப்பு அறிவிப்புக்கு முன்னதாக ரிசர்வ் வங்கியின் வாரியக் கூட்டங்கள் தொடர்பான ஆவணங்களைப் பார்க்க விரும்புவதாகவும் கூறிய அரசியல் சாசன அமர்வு, இந்த வழக்கின் விசாரணையை நவம்பர் 9ஆம் தேதிக்கு தள்ளி வைத்தது.