UNHCR எனப்படும் அகதிகளுக்கான ஐக்கிய நாடுகளின் ஆணையமானது அகதிகளை பாதுகாப்பது, ஆதரவளிப்பது, மீள் குடியமர்த்துதல், மீள் திரும்புதல் உள்ளிட்ட நடவடிக்கைகளை மேற்கொண்டு வருகிறது. இதன் தலைமையகம் சுவிட்சர்லாந்து நாட்டின் ஜெனிவா நகரில் அமைந்துள்ளது. இந்த அலுவலகத்தின் கிளை பல்வேறு நாடுகளில் காணப்படுகிறது.
இந்நிலையில் மலேசியாவில் உள்ள அகதிகளை நிர்வகிக்கும் பொறுப்பினை அந்நாட்டு அரசே கையில் எடுத்துள்ளது. இதன் காரணமாக மலேசியாவில் உள்ள ஐக்கிய நாடுகள் அகதிகள் ஆணையத்தின் அலுவலகத்தை மூடும் முடிவு எடுக்கப்பட்டுள்ளதாக தகவல்கள் வெளியாகின. இதனை உறுதி செய்யும் வகையில் மலேசியாவின் சிறப்பு செயல்பாடுகளுக்கான அமைச்சர் லட்டிப் அகமது கருத்து தெரிவித்திருந்தார்.
இதனை கைவிடுமாறு மலேசிய அரசுக்கு IDEAS எனப்படும் ஜனநாயகம் மற்றும் பொருளாதார விவகாரங்களுக்கான ஆய்வு மையம் வலியுறுத்தியுள்ளது. இதுதொடர்பாக IDEAS ஆய்வு மையத்தின் தலைமை நிர்வாக அதிகாரி திரிசியா யோஹ் கூறுகையில், ஐ.நா அகதிகள் சாசனத்தில் கையெழுத்திடாத நாடாக மலேசியா இருக்கிறது.
இந்நிலையில் மலேசியாவில் இருக்கும் அகதிகள் மற்றும் தஞ்சக் கோரிக்கையாளர்களை பாதுகாப்பதில் ஐ.நா அகதிகள் ஆணையம் முக்கிய பங்கு வகித்து வருகிறது. அகதிகள் அந்தஸ்தை தீர்மானித்தல், மீள் குடியமர்த்தல் உள்ளிட்ட பல்வேறு விதமான பாதுகாப்பினை அகதிகளுக்கு ஐ.நா அகதிகள் ஆணையம் வழங்கி வருகிறது.
மிகவும் ஆபத்தான நாடு பாகிஸ்தான் – அமெரிக்க அதிபர் பைடன் பகீர்!
குறிப்பாக சுகாதாரம், கல்வி, பொருளாதார உதவி, தங்குமிட வசதி, ஆலோசனை, இதர நலத்திட்ட உதவிகள் உள்ளிட்டவற்றை அகதிகளுக்கு வழங்குவதற்காக பல தொண்டு நிறுவனங்களுடன் ஐ.நா ஆணையம் இணைந்து பணியாற்றி வருகிறது. இப்படிப்பட்ட சூழலில் மலேசியாவில் உள்ள ஐக்கிய நாடுகள் அகதிகள் ஆணையத்தின் அலுவலகத்தை மூடுவது சரியாக இருக்காது.
முதலில் அகதிகள் மற்றும் தஞ்சக் கோரிக்கையாளர்களை நிர்வகிப்பதற்கான அர்ப்பணிப்பு மற்றும் தயார் நிலையை வெளிப்படுத்த மலேசிய அரசு 1951 அகதிகள் சாசனத்தில் கையெழுத்திட வேண்டும். இல்லையெனில் மலேசியாவிற்கு என சர்வதேச தரத்திலான அகதிகள் கொள்கை மற்றும் சட்ட கட்டமைப்பை உருவாக்க வேண்டும். அதன்பிறகே UNHCR அலுவலகத்தை மூடும் முடிவை எடுக்க வேண்டும். அதுவரை மலேசிய அரசு தனது முடிவை கைவிட வேண்டும் என்று கேட்டுக் கொள்ளப்பட்டுள்ளது.