வடகிழக்கு பருவமழை காலம் தொடங்கி உள்ளதையடுத்து தமிழகத்தின் பெரும்பாலான மாவட்டங்களில் கடந்த சில தினங்களாக பரவலாக மழை பெய்து வருகிறது. இந்த நிலையில் சென்னை. திருவள்ளூர், காஞ்சிபுரம் செங்கல்பட்டு உள்ளிட்ட வடமாவட்டங்களில் இன்று மாலை முதல் மழை கொட்டித் தீர்த்து வருகிறது.
குறிப்பிட்ட மாவட்டங்களில் இன்னும் இரண்டு நாட்களுக்கு மழை நீடிக்கும் எனவும், குறிப்பாக நாளை (நவம்பர் 1) கனமழை பெய்யும் என்றும் சென்னை வானிலை ஆய்வு மையம் எச்சரி்க்கை இன்று எச்சரிக்கை விடுத்திருந்தது.
வானிலை ஆய்வு மையத்தின் கனமழை எச்சரிக்கை காரணமாக, சென்னை, திருவள்ளூர், காஞ்சிபுரம், செங்கல்பட்டு ஆகிய நான்கு மாவட்டங்களில் பள்ளிகளுக்கு மட்டும் நாளை (நவம்பர் 1) விடுமுறை அளிக்கப்படுவதாக அந்தந்த மாவட்ட நிர்வாகங்கள் அறிவித்துள்ளன.
முன்னதாக தி.நகர், மயிலாப்பூர், சைதாப்பேட்டை உள்ளிட்ட மாநகரின் பவ்வேறு இடங்களிலும், சென்னை புறநகர் பகுதிகளிலும் இன்று மாலை தொடங்கி இரவு வரை தொடர்ந்து மழை பெய்ததால் அலுவலகம் சென்று வீடு திரும்பிய பணியாளர்கள் மிகுந்த சிரமத்துக்கு ஆளானார்கள்.
தொடர் மழை காரணமாக நகரின் பல பகுதிகளில் சாலைகளில் மழைநீர தேங்கி நின்றதால் இருசக்கர வாகன ஓட்டிகள் மிகவும் சிரமப்ப்டடு வண்டியை செலுத்த வேண்டியதானது. இதனால் மாநகரில் பெரும்பாலான பகுதிகளில் அண்மையில் அமைக்கப்பட்ட மழைநீர் கால்வாய்களின் பயன் என்ன என்ற கேள்வியும் பொதுமக்கள் மத்தியில் எழுந்துள்ளது.