சென்னை கோட்டூர்புரத்தில் உள்ள அண்ணா நூற்றாண்டு நூலகம் முன்னாள் முதல்வர் கருணாநிதியால் தொடங்கி வைக்கப்பட்டது. இங்கு 6.2 லட்சம் புத்தகங்கள் இருக்கின்றன. 3,000 இ-புத்தகங்கள் உள்ளன. தமிழ் மொழி, மருத்துவம், பொறியியல், விவசாயம், மேலாண்மை, சட்டம், பொருளாதாரம், கால்நடை அறிவியல், புவியியல், கணினி அறிவியல், புள்ளியியல், சமூக அறிவியல், மதம், உளவியல், கணிதம், வானியல் என பல்வேறு வகையான புத்தகங்கள் இடம்பெற்றுள்ளன. தினசரி 2 ஆயிரம் முதல் 2 ஆயிரத்து 500 வாசகர்கள் நூலகத்திற்கு வந்து செல்கின்றனர்.
மாணவர்கள் மற்றும் சிவில் சர்வீஸ் தேர்விற்கு தயாராகும் நபர்கள் அதிக அளவில் பயன்படுத்தி வருகின்றனர். இந்த நூலகம் கடந்த அதிமுக ஆட்சியில் போதிய பராமரிப்பின்றி காணப்பட்டது. இந்நிலையில் முதல்வர் மு.க.ஸ்டாலின் தலைமையில் திமுக ஆட்சி அமைந்ததும் மீண்டும் புத்துணர்ச்சி பெறத் தொடங்கியது. பள்ளிக் கல்வித்துறை சார்பில் நடத்தப்படும் கூட்டங்கள் பெரும்பாலும் அண்ணா நூற்றாண்டு நூலகத்தில் தான் நடைபெற்று வருகின்றன.
அங்குள்ள ஆடிட்டோரியம் அரங்கில் பல்வேறு நிகழ்ச்சிகள் தொடர்ச்சியாக நடைபெற்று வருகின்றன. கல்வித் தொலைக்காட்சியில் ஒளிபரப்பப்படும் வீடியோக்களும் இங்கு தான் எடுக்கப்படுகின்றன. இந்நிலையில் புதிய கழிவறைகள், புதுப்பிக்கப்பட்ட தரைத்தளம், புதிய எல்.இ.டி சுவர், உயர் தர ஏசி, புதிய உபகரணங்கள், சிறப்பு விளக்கு அலங்காரங்கள் என வேற லெவலுக்கு மாற்றுவதற்கு நடவடிக்கை எடுக்கப்பட்டு வருகிறது.
வரும் நவம்பர் இரண்டாவது வாரத்தில் புதுப்பொலிவுடன் திறக்க ஏற்பாடு செய்யப்பட்டுள்ளது. இதன்மூலம் இளம் வாசகர்களை கவர திட்டமிடப்பட்டிருக்கிறது. அதுமட்டுமின்றி சிறுவர், சிறுமியர்களுக்கு பல்வேறு நிகழ்ச்சிகளை நடத்தவும் முடிவு செய்யப்பட்டுள்ளது. இதுதவிர ‘TN Talk’ என்ற தொடர் நிகழ்ச்சி நவம்பர் மூன்றாவது வாரத்தில் இருந்து நடத்த ஆலோசிக்கப்பட்டு வருகிறது.
இதில் சர்வதேச எழுத்தாளர்கள், விஞ்ஞானிகள் உள்ளிட்டோர் பங்கேற்று உரையாற்றுவர். மேலும் குழந்தைகளுக்கு Virtual Reality Library அமைக்கப்படவுள்ளது. நூலகத்தில் இருக்கும் அனைத்து கணினிகளையும் புதிதாக மாற்றவிருக்கின்றனர். குறைந்த விலையில் தரமான உணவு வழங்கும் வகையில் உணவகம் ஒன்றும் வருகிறது.
புதிதாக புத்தகங்கள் மற்றும் இ-புத்தகங்களை கொண்டு வர திட்டமிடப்பட்டுள்ளது. வாரந்தோறும் குழந்தைகளுக்கு கதை சொல்லும் நிகழ்வுகள், கிட்ஸ் திருவிழா, மாறுவேடப் போட்டி, ஓவியப் போட்டிகள் உள்ளிட்டவையும் நடத்தப்படவுள்ளன. மேற்குறிப்பிட்ட விஷயங்களுக்கு 38 கோடி ரூபாய் நிதியை தமிழக அரசு ஒதுக்கியுள்ளது குறிப்பிடத்தக்கது.