குஜராத்தின் மோர்பி நகரில் உள்ள தொங்கு பாலம் கடந்த 30ஆம் தேதி விழுந்து விபத்துக்குள்ளானது. சுமார் 140 ஆண்டுகளுக்கு முன்பு கட்டப்பட்ட இந்தப் பாலத்தில் ரூ.2 கோடியில் புனரமைப்புப் பணிகள் மேற்கொள்ளப்பட்டு, கடந்த தீபாவளியன்று மக்கள் பயன்பாட்டுக்கு திறக்கப்பட்ட நிலையில், பாலம் விழுந்து விபத்துக்குள்ளாகியுள்ளது. புனரமைப்புப் பணிகளுக்காக கடந்த மார்ச் மாதம் மூடப்பட்ட இப்பாலத்தை சுமார் ஓராண்டுக்கு மூட முடிவு செய்யப்படது. ஆனால், 5 மாதங்களுக்கு முன்னதாகவே பாலம் பயன்பாட்டுக்காக திறக்கப்பட்டது என்பது கவனிக்கத்தக்கது.
இந்த விபத்தில் சிக்கி 135 பேர் உயிரிழந்துள்ளனர். மேலும், பலர் படுகாயமடைந்து மருத்துவமனையில் சிகிச்சை பெற்று வருகின்றனர். மோர்பி பாலம் விபத்து தொடர்பாக குஜராத் மாநில அரசு விசாரணை கமிஷன் அமைத்து உத்தரவிட்டுள்ளது. இதுகுறித்து வழக்குப்பதிவு செய்துள்ள போலீசார் பாலத்தை புதுப்பித்த கட்டுமான நிறுவனத்தை சேர்ந்தவர்கள், டிக்கெட் புக்கிங் க்ளர்க், பாதுகாவலர்கள் என 9 பேரை கைது செய்துள்ளனர். அவர்கள் மீது இந்திய தண்டனைச் சட்டப் பிரிவு 304ன் கீழ் வழக்குப் பதிவு செய்யப்பட்டுள்ளது.
இந்த நிலையில், மோர்பி பாலத்தின் கேபிள்கள் சீரமைக்கப்படவில்லை என குஜராத் மாநில அரசு நீதிமன்றத்தில் தகவல் தெரிவித்துள்ளது. மாஜிஸ்திரேட் நீதிமன்றத்தில் நடைபெற்று வரும் இது தொடர்பான வழக்கில் அரசுத் தரப்பில் ஆஜரான எச்.எஸ்.பஞ்சால், “பாலத்தின் நடைபகுதி மட்டுமே சீரமைக்கப்பட்டுள்ளது. கேபிள்கள் சீரமைக்கப்படவில்லை. அதனாலேயே சுமையை தாங்க முடியாமல் கேபிள் அறுந்து விழுந்துள்ளது. பால சீரமைப்பில் இரண்டு ஒப்பந்ததாரர்கள் ஈடுபட்டனர். இரு நிறுவனங்களுக்குமே இதை மேற்கொள்ளும் தகுதியில்லை. 2007ஆம் ஆண்டில் இவர்கள் தான் பராமரிப்புப் பணிகளை மேற்கொண்டுள்ளனர். அதன் அடிப்படையில் 2022ஆம் ஆண்டிலும் இவர்களுக்கே கொடுக்கப்பட்டுள்ளது. இதில் ஒப்பந்ததாரர்களை காவலில் எடுத்து விசாரித்தால் தான் எதற்காக அவர்களிடம் ஒப்பந்தம் ஒப்படைக்கப்பட்டது என்பதற்கான பின்னணி தெரியவரும்.” என்று வாதிட்டார்.
இதையடுத்து, ஒப்பந்த நிறுவனத்தின் இரண்டு மேலாளர்களையும், இரண்டு சப் காண்ட்ராக்டர்களையும் சனிக்கிழமை வரை காவலில் எடுத்து விசாரிக்க அனுமதியளித்து உத்தரவிட்ட நீதிமன்றம், எஞ்சிய ஐந்து பேரை நீதிமன்ற காவலில் சிறையில் அடைக்க உத்தரவிட்டுள்ளது.
மோர்பி தொங்கு பாலம் விபத்து தொடர்பாக தாக்கல் செய்யப்பட்டுள்ள பொதுநல மனுவை வருகிற 14-ஆம் தேதி விசாரணைக்கு எடுத்துக் கொள்வதாக உச்ச நீதிமன்ற தலைமை நீதிபதி லலித் ஒப்புதல் அளித்துள்ளார் என்பது குறிப்பிடத்தக்கது.