அனந்தபூர்: ஆந்திரா மாநிலம் அனந்தபூர் மாவட்டம் தர்காஹொன்னூரை சேர்ந்த கூலி தொழிலாளர்கள், விவசாய பணிக்காக டிராக்டரில் புறப்பட்டனர். வழியில், எதிர்பாராத விதமாக உயரழுத்த மின்கம்பி திடீரென அறுந்து டிராக்டரில் விழுந்தது. இதில், கூலி தொழிலாளர்கள் மீது மின்சாரம் தாக்கியது. சம்பவ இடத்திலேயே 6 பேர் துடிதுடித்து பரிதாபமாக உயிரிழந்தனர். 3 பேர் படுகாயத்துடன் உயிருக்கு போராடினர்.
இதையறிந்த மின்வாரிய அதிகாரிகள் உடனடியாக மின் இணைப்பை துண்டித்தனர். இதற்கிடையில், அனந்தபூர் போலீசார் மற்றும் அப்பகுதி மக்கள் சம்பவ இடத்துக்கு விரைந்து சென்று காயமடைந்த 3 பேரையும் அதே பகுதியில் உள்ள மருத்துவமனைக்கு அனுப்பி வைத்தனர். போலீசார் வழக்கு பதிந்து விசாரித்து வருகின்றனர். இச்சம்பவம் அப்பகுதியில் பெரும் பரபரப்பை ஏற்படுத்தியுள்ளது.