பால் கொள்முதல், பதப்படுத்துதல், குளிரூட்டுதல் மற்றும் விற்பனை ஆகிய பணிகளைச் செய்து தமிழக அரசின் பொதுத்துறை நிறுவனமான ஆவின் செய்து வருகிறது. தமிழ்நாடு அரசின் பால்வளத் துறை அமைச்சகத்தின் கீழ் செயல்பட்டு வரும் ஆவின் நிறுவனம், பால் விற்பனையில் தமிழகத்தின் முன்னோடியாக திகழ்ந்து வருகிறது. சில சமயங்களில் முறைகேடு புகார்களிலும் ஆவின் நிறுவனம் சிக்கி வருகிறது.
அந்த வகையில், ஏற்கனவே உற்பத்தி, விற்பனையில் இருக்கும் ஆவின் டிலைட் பால் மீண்டும் அறிமுகம் செய்யப்பட்டுள்ளதாக விமர்சனங்கள் எழுந்துள்ளன. தமிழக அரசின் பொதுத்துறை கூட்டுறவு நிறுவனமான ஆவின் நிறுவனம் குளிர்சாதன பெட்டியில் வைக்காமல் பயன்படுத்தக் கூடிய UHT தொழில்நுட்பத்தில் உற்பத்தி செய்யப்படும் 90 நாட்கள் காலாவதி கொண்ட ஆவின் டிலைட் (Aavin Delite) பால் பாக்கெட்டுகளை அறிமுகம் செய்துள்ளதாக நேற்று செய்திகள் வெளியாகின.
ஆனால், 2006-2011 திமுக ஆட்சி காலத்தில் சேலம் மாவட்ட பால் உற்பத்தியாளர்கள் ஒன்றியத்தில் கடந்த 2008ஆம் ஆண்டு முதல் UHT (Ultra-High Temperature) தொழில்நுட்பத்தில் தயாராகும் 4.5% கொழுப்பு சத்து, 8.5% திடசத்துள்ள 180 நாட்கள் வரை கெட்டுப்போகாத மற்றும் 3.5% கொழுப்பு சத்து, 8.5% திடசத்துள்ள 90 நாட்கள் வரையிலும் கெட்டுப்போகாத குளிர்சாதன பெட்டியில் வைக்காமல் பயன்படுத்தக் கூடிய ‘Aavin Delite – Pure Cows Milk’ எனும் பெயரிலான பால் பாக்கெட்டுகள் உற்பத்தி செய்யப்பட்டு வெளிநாடுகளுக்கு ஏற்றுமதி செய்யப்படுவதோடு, தமிழகத்திலும் விற்பனையில் இருந்து வருகிறது.
அதுதவிர, சென்னை சோழிங்கநல்லூர் பால் பண்ணையில் UHT தொழில்நுட்பத்தில் 90 மற்றும் 12 0நாட்கள் காலாவதி தேதி கொண்ட UHT தொழில்நுட்பத்திலான பால் பாக்கெட்டுகள் உற்பத்திக்கான கட்டமைப்புகளை சுமார் 30 கோடி மதிப்பில் கடந்த அதிமுக ஆட்சியில் 2018ஆம் ஆண்டு அப்போதைய முதல்வர் எடப்பாடி பழனிசாமியால் தொடங்கி வைக்கப்பட்டு, 2019ஆம் ஆண்டு முதல் ‘Long Life’ எனும் பெயரில் விற்பனைக்கு கொண்டு வரப்பட்டது.
அந்த வகையில், ஏற்கனவே உற்பத்தி, விற்பனையில் இருக்கும் ஆவின் டிலைட் பால் மீண்டும் எப்படி அறிமுகம் செய்யப்படும் என தமிழ்நாடு பால் முகவர்கள் தொழிலாளர்கள் நலச் சங்கத்தின் நிறுவனத் தலைவர் பொன்னுசாமி கேள்வி எழுப்பியுள்ளார்.
இதுகுறித்து அவர் கூறுகையில், “ஏற்கனவே சேலம் ஒன்றியத்தின் பால் பண்ணையில் “Aavin Delite” “Pure Cows Milk”, சென்னை சோழிங்கநல்லூர் பால் பண்ணையில் “Long Life” எனும் பெயர்களில் 90, 120, 180 நாட்கள் வரையிலும் குளிர்சாதன பெட்டியில் வைக்காமல் பயன்படுத்தக் கூடிய UHT தொழில்நுட்பத்திலான பால் பாக்கெட்டுகள் உற்பத்தி செய்யப்பட்டு, விற்பனை செய்யப்பட்டு வரும் நிலையில் பழைய பாக்கெட் வடிவமைப்பை மட்டும் மாற்றி விட்டு ‘பழைய மொந்தையில் புதிய கள்’ என்கிற அடிப்படையில் புதிதாக அறிமுகம் செய்வதாக கூறுவது தமிழக முதல்வரையும், பொதுமக்களையும் ஏமாற்றுகின்ற செயலாகும் என்பதால் ஆவின் நிர்வாகத்தின் இந்த செயலை தமிழ்நாடு பால் முகவர்கள் தொழிலாளர்கள் நலச் சங்கம் வன்மையாகக் கண்டிக்கிறது.” என்றார்.
இது ஆவின் பார்லர்களில் மட்டுமே கிடைக்கும் என்று கூறிய அவர், “அப்போது கூட இந்த தயாரிப்புக்கு அதிக தேவை இல்லை. ஏனெனில் கஜா மற்றும் வர்தா புயல்களின் போது ஏற்பட்ட நீண்ட மின்வெட்டுகளை எதிர்கொள்ளும் போது மட்டுமே பொதுமக்கள் இத்தகைய பால் பாக்கெட்டுகளை நாடுவார்கள். தற்போது மின் நிலை சீராக இருப்பதால், இந்த தயாரிப்புக்கான தேவை குறைவாக இருக்கும் என எதிர்பார்க்கிறோம்.” என்றும் தெரிவித்துள்ளார்.
ஆவின் நிறுவனத்தில் ஆக்கப்பூர்வமாக பணிகளை முன்னெடுக்கவில்லை எனவும் பொன்னுசாமி குற்றம் சாட்டுகிறார். “ஆவின் நிறுவனத்தின் வளர்ச்சிக்கு பால் விற்பனையையும், பால் கொள்முதலையும் அதிகப்படுத்த ஆக்கபூர்வமான பணிகளை முன்னெடுக்காமல் ஏற்கனவே உற்பத்தியில், விற்பனையில் உள்ள பால் மற்றும் பால் பொருட்களுடைய வடிவத்தையும், அளவையும் மட்டும் மாற்றம் செய்து புதிது போல கட்டமைக்க முயல்வது என்பது ஆவினை அழிவிற்கே கொண்டு செல்லும்.” எனவும் சுட்டுக்காட்டுகிறார்.
தொடர்ந்து பேசும் அவர், ஆவின் நிர்வாகத்தின் செயல்பாடுகளை தமிழக முதல்வர் நேரடியாக கண்காணிக்க முன்வர வேண்டும் எனவும் அரசுக்கு தவறான தகவல்களை கொடுத்து பழைய பொருட்களை புதிதாக அறிமுகம் செய்வது போல் செய்யும் ஆவின் அதிகாரிகள் மீது நடவடிக்கை எடுக்க வேண்டும் எனவும் தமிழ்நாடு பால் முகவர்கள் தொழிலாளர்கள் நலச் சங்கம் சார்பில் வலியுறுத்தி கேட்டுக் கொள்கிறோம் என்றும் தெரிவித்துள்ளார்.
அதேசமயம், ஆவின் டிலைட் பால் புதிய தயாரிப்பு இல்லை என ஆவின் நிர்வாக இயக்குனர் சுப்பையன் ஒப்புக் கொண்டுள்ளார். ஆனால் டிலைட் பால் உற்பத்தி மீண்டும் தொடங்கப்பட்டுள்ளதாகவும் அவர் கூறுகிறார். ஆவின் டிலைட் பால் சர்ச்சை குறித்து அவர் கூறுகையில், “சேலம் ஆலை 8 ஆண்டுகளுக்கும் மேலாக செயலிழந்ததால், இந்த தயாரிப்புகள் உற்பத்தி செய்யப்படவில்லை. சோழிங்கல்லூர் ஆலை செயல்படத் தொடங்கிய பிறகுதான், டிலைட் பால் மீண்டும் உற்பத்தி செய்யப்பட்டு வருகிறது.” என்று விளக்கம் அளித்துள்ளார்.