அவதார்: தி வே ஆப் வாட்டர் படத்தின் டிரைலர் வெளியாகியுள்ளது. ஆச்சரியப்படுத்தும் கிராபிக்ஸ் காட்சிகள் கொண்ட இந்த டிரைலர் ரசிர்களை வெகுவாக கவர்ந்துள்ளது.
‘டைட்டானிக்’, ‘தி டெர்மினேட்டர்’ மற்றும் ‘டெர்மினேட்டர் 2: ஜட்ஜ்மென்ட் டே’ போன்ற பிளாக் பஸ்டர் வெற்றிப் படங்களை தயாரித்த கனேடிய திரைப்பட தயாரிப்பாளர் ஜேம்ஸ் கேமரூன், சுமார் 1500 கோடி ரூபாய் செலவில் ‘அவதார்’ திரைப்படத்தை இயக்கி இருந்தார். தனி உலகத்தில் வாழும் அவதார்களை கண்காணிக்க அனுப்பப்படும் ஹீரோ அவர்கள் இடத்தை ஆக்கிரமிப்பதை எதிர்த்து அவதார்களுடன் சேர்ந்து வெல்வதே இப்படத்தின் கதை.
இந்தப் படம் சிறந்த ஒளிப்பதிவு, சிறந்த கலை இயக்கம் மற்றும் சிறந்த விஷுவல் எஃபெக்ட்களுக்கான மூன்று ஆஸ்கர் விருதுகளை வென்றது மட்டுமில்லாமல், உலகம் முழுவதும் வசூல் சாதனை நிகழ்த்தியது. படத்தில் இடம்பெற்ற கற்பனை உலகமும், கிராபிக்ஸ் தொழில் நுட்பங்களும் ரசிகர்களை வியப்பில் ஆழ்த்தி மெய் சிலிர்க்க வைத்தது.
இதையடுத்து, ‘அவதார்’ திரைப்படத்தின் இரண்டாம் பாகம் தயாராகி உள்ளது. இந்தப் படத்துக்கு ‘அவதார்: தி வே ஆப் வாட்டர்’ என்று பெயர் வைத்துள்ளனர். இப்படம் தமிழ், தெலுங்கு, ஹிந்தி, கன்னடம், மலையாளம் உள்ளிட்ட 160 மொழிகளில் டிசம்பர் மாதம் 16-ம் தேதி திரையரங்குகளில் வெளியாக உள்ளது.
இந்நிலையில், ‘அவதார்: தி வே ஆப் வாட்டர்’ திரைப்படத்தின் டிரைலர் வெளியாகி உள்ளது. தண்ணீரை மையமாக வைத்து வெளியாகி உள்ள டிரைலர் மெய்சிலிர்க்க வைத்துள்ளது. கடலில் வாழும் உயிரினங்களையும், கனிம வளங்களையும், பாதுகாக்கும் நவி இன மக்கள் குறித்த கதையாக இருக்கும் என கூறப்படுகிறது. ஆச்சரியப்படுத்தும் கிராபிக்ஸ் காட்சிகள் கொண்ட இந்த டிரைலர் ரசிர்களை வெகுவாக கவர்ந்துள்ளது.
‘டைட்டானிக்’ படத்தில் ரோஸ் என்ற கதாபாத்திரத்தில் நடித்த கேட் வின்ஸ்லெட் இப்படத்தில் முக்கிய கதாபாத்திரத்தில் நடித்துள்ளார். ஜோ சல்டனா, சாம் வோர்திங்டன், சிகோர்னி வீவர், ஸ்டீபன் லாங், கிளிஃப் கர்டிஸ் என பலரும் இதில் நடித்துள்ளனர்.