கேரள மாநிலத்தில் பொதுத் துறை ஊழியர்களின் ஓய்வு வயதை 60 ஆக உயர்த்திய உத்தரவு ரத்து செய்யப்பட்டு உள்ளது.
கேரள மாநிலத்தில், முதலமைச்சர் பினராயி விஜயன் தலைமையிலான இடது ஜனநாயக முன்னணி ஆட்சி நடைபெற்று வருகிறது. இந்நிலையில், அரசு போக்குவரத்து கழகம், மின் வாரியம், குடிநீர் வடிகால் வாரியம் தவிர 122 பொதுத் துறை நிறுவனங்கள், 6 நிதிக் கழகங்களில் பணியாற்றும் ஊழியர்களின் ஓய்வு பெறும் வயது 58 ஆக இருந்தது.
கடந்த சில நாட்களுக்கு முன்பு நிபுணர் குழு பரிந்துரையை ஏற்று ஓய்வு பெறும் வயதை 60 ஆக கேரள மாநில அரசு உயர்த்தியது. இதற்கு, முதலமைச்சர் பினராயி விஜயன் தலைமையில் நடைபெற்ற மாநில அமைச்சரவைக் கூட்டத்தில் ஒப்புதல் அளிக்கப்பட்டது. இந்த முடிவால், 1.50 லட்சம் ஊழியர்கள் பயன் அடைவார்கள் என்றும் அரசு சார்பில் தெரிவிக்கப்பட்டது. அரசின் இந்த முடிவுக்கு எதிர்க்கட்சிகள் கடும் கண்டனம் தெரிவித்தது.
மேலும் காங்கிரஸ், பாஜக உள்ளிட்ட பிரதான எதிர்க்கட்சிகள் அரசின் இந்த முடிவு வேலையின்றி தவிக்கும் லட்சக் கணக்கான இளைஞர்களுக்கு செய்யும் துரோகம் என்று கூறியதுடன் போராட்டங்களையும் நடத்தியது.
இந்நிலையில், எதிர்க்கட்சிகளின் எதிர்ப்பை தொடர்ந்து பொதுத் துறை நிறுவனங்களில் பணியாற்றும் ஊழியர்களின் ஓய்வு வயது 60 ஆக உயர்த்தி வெளியான உத்தரவு ரத்து செய்யப்படுவதாக கேரள அரசு அறிவித்துள்ளது. மேலும், இதற்கான அரசாணையும் வெளியிடப்பட்டு உள்ளது. இது, எதிர்க்கட்சிகளுக்கு கிடைத்த வெற்றி என்று எதிர்க்கட்சித் தலைவர் வி.டி சதீஷன் கூறியுள்ளார்.