பொருளாதாரத்தில் நலிவடைந்த உயர் சாதியினருக்கு கல்வி மற்றும் வேலைவாய்ப்பில் 10 சதவீதம் இட ஒதுக்கீடு அளிக்கும் அவசர சட்டத்தை மோடி தலைமையிலான பாஜக அரசு நாடாளுமன்றத்தில் அவசர சட்டமாக கொண்டுவந்தது. இது பெரும்பான்மையுடன் நாடாளுமன்றத்தில் நிறைவேற்றப்பட்டு, குடியரசுத் தலைவர் ஒப்புதலுக்கு அனுப்பி வைக்கப்படது. அவர் ஒப்புதல் அளித்துள்ளதால் இந்த சட்டம் அமலில் உள்ளது.
இந்த சட்டத்தை எதிர்த்து உச்ச நீதிமன்றத்தில் பலரும் வழக்கு தொடர்ந்தனர். திமுகவின் ஆர்.எஸ்.பாரதி, விடுதலை சிறுத்தைகள் கட்சித் தலைவர் திருமாவளவன் உள்ளிட்டோரும் இந்த வழக்கில் இடையீட்டு மனுத்தாக்கல் செய்தனர்.
இந்த வழக்கை உச்சநீதிமன்ற தலைமை நீதிபதி யு.யு.லலித், நீதிபதிகள் எஸ்.ரவீந்திர பட், தினேஷ் மகேஸ்வரி, எஸ்பி பார்திவாலா, பேலா திரிவேதி ஆகிய 5 பேர் அடங்கிய அரசியல் சாசன அமர்வு விசாரித்து வருகிறது. அரசு சார்பில் அட்டர்னி ஜெனரல் கேகே வேணுகோபல், சோலிசிடர் ஜெனரல் துஷார் மேத்தா ஆகியோர் ஆஜராகி சட்டத்திருத்தம் முறையானது என வாதிட்டனர். 1973ஆம் ஆண்டு கேசவாநந்த பாரதி வழக்கு, மண்டல் வழக்கு தீர்ப்பளித்த இந்திரா ஷாவ்னே வழக்கு உள்ளிட்ட வழக்குகளை கருத்தில் கொண்டும் உச்ச நீதிமன்ற அரசியல் சாசன அமர்வு விசாரணை நடத்தியது.
பொருளாதாரத்தில் நலிவடைந்த உயர் சாதியினருக்கு மத்திய அரசு கொண்டு வந்த 10 சதவீத இட ஒதுக்கீட்டிற்காக மத்திய அரசு கொண்டுவந்த 103ஆவது சட்ட திருத்தம் அரசியல் சாசனத்தின் அடிப்படை தன்மையை மீறியுள்ளதா அல்லது அடிப்படை தன்மை மாறாமல் நிறைவேற்றப்பட்டுள்ளதா என்ற கோணத்திலும் விசாரிக்கப்பட்டது.
இந்த வழக்கின் இறுதி கட்ட விசாரணை செப்டம்பர் மாதத்தில் நடைபெற்றது. அனைத்து தரப்பு வாதங்களும் முடிவடைந்து, எழுத்துப்பூர்வமாக வாதங்கள் தாக்கல் செய்யப்பட்டுள்ள நிலையில், இந்த வழக்கின் தீர்ப்பை தலைமை நீதிபதி லலித் தலைமையிலான 5 பேர் அடங்கிட உச்ச நீதிமன்றத்தின் அரசியல் சாசன அமர்வு வருகிற 7ஆம் தேதி (நாளை) காலை 10.30 மணிக்கு வழங்குகிறது.
இதனிடையே, தலைமை நீதிபதி ஒரு தீர்ப்பும், நீதிபதி ரவீந்திர பட் ஒரு தீர்ப்பும் அளிக்க உள்ளதாகத் தெரிய வந்துள்ளது. அதாவது, இந்த சட்டத்துக்கு நீதிபதிகள் அமர்வில் பெரும்பான்மை ஆதரவு கிடைக்க வாய்ப்புள்ளதாக தகவல்கள் வெளியாகியுள்ளன.
இதுகுறித்து விழுப்புரம் எம்.பி. ரவிக்குமார் கூறுகையில், “இந்த வழக்கின் விசாரணையையும் நீதிபதிகளின் அணுகுமுறைகளையும் கவனித்த வரையில் 3 பேர் ஆதரவு 2 பேர் எதிர்ப்பு என்ற நிலையில் தீர்ப்பு இருக்கக்கூடும் என்றே தோன்றுகிறது.” என்று தெரிவித்துள்ளார்.
தொடர்ந்து பேசும் அவர், “EWS இட ஒதுக்கீடு என்பது ஒட்டுமொத்த இட ஒதுக்கீட்டையும் ஒழித்துக்கட்ட சனாதனவாதிகள் கண்டுபிடித்திருக்கும் தந்திரம். இதை நாம் புரிந்துகொள்ள வேண்டும். இட ஒதுக்கீடு தொடர்பான பிரச்சினைகளுக்கு நீதிமன்றத்தில் அல்ல, மக்கள் மன்றத்தில்தான் தீர்வுகாண வேண்டும். பாஜகவின் இந்த சனாதன சதித்திட்டத்துக்கு எதிராக சமூகநீதி சக்திகள் ஒன்றிணைய வேண்டும்.” எனவும் வலியுறுத்தியுள்ளார்.