“என் வார்த்தைகள் அல்ல; என் வேலை பேசும்,” என, உச்ச நீதிமன்றத்தின் புதிய தலைமை நீதிபதியாக பொறுப்பேற்றுக் கொண்ட டி.ஒய்.சந்திரசூட் தெரிவித்து உள்ளார்.
உச்ச நீதிமன்றத்தின் 50 ஆவது தலைமை நீதிபதியாக டி.ஒய்.சந்திரசூட் இன்று பதவி ஏற்றுக் கொண்டார். குடியரசுத் தலைவர் மாளிகையில் நடைபெற்ற விழாவில், அவருக்கு, குடியரசுத் தலைவர் திரெளபதி முர்மு பதவிப் பிரமாணம் செய்து வைத்தார். உச்ச நீதிமன்றத்தின் புதிய தலைமை நீதிபதியாக பொறுப்பேற்றுக் கொண்ட டி.ஒய்.சந்திரசூட், வரும் 2024 ஆம் ஆண்டு நவம்பர் மாதம் 10 ஆம் தேதி வரை பதவியில் நீடிப்பார்.
கடந்த 1998 ஆம் ஆண்டு கூடுதல் சொலிசிட்டர் ஜெனரலாக பணியாற்றிய டி.ஒய்.சந்திரசூட், 2013 ஆம் ஆண்டு அலகாபாத் உயர் நீதிமன்றத்தின் தலைமை நீதிபதியாக பதவியேற்றார். பின்னர் 2016 ஆம் ஆண்டு உச்ச நீதிமன்ற நீதிபதியாக பதவி உயர்வு பெற்றார். இவரது தந்தை ஒய்.வி.சந்திரசூட், உச்ச நீதிமன்றத்தின் முன்னாள் தலைமை நீதிபதி ஆவார். இவர், 1978 முதல் 1985 வரை தலைமை நீதிபதியாக பதவி வகித்துள்ளார். தந்தைக்கு பிறகு அதே அரியணையில் டி.ஒய்.சந்திரசூட் அமர்ந்துள்ளார்.
இந்நிலையில், உச்ச நீதிமன்றத்தின் புதிய தலைமை நீதிபதி டி.ஒய்.சந்திரசூட் கூறுகையில், “சாதாரண குடிமகனுக்கு சேவை செய்வதே எனது முன்னுரிமை. நீதித்துறை செயல்முறைகளில் சீர்திருத்தங்கள் மேற்கொள்ளப்படும். என் வார்த்தைகள் அல்ல; என் வேலை பேசும்,” என்றும் தெரிவித்தார்.