நெல்லை சீவலப்பேரியில் பெரும் பதற்றத்தை ஏற்படுத்திய மாயாண்டி கொலையில் ஐந்து நாட்களாக நீடித்த போராட்டத்தை சபாநாயகர் தலையிட்டு முடிவுக்கு கொண்டு வந்ததை தொடர்ந்து உறவினர்கள் இன்று உடலை பெற்றுக் கொண்டனர். முன்னெச்சரிக்கையாக நெல்லை அரசு மருத்துவமனையை சுற்றி போலீஸ் குவிக்கப்பட்டிருந்தது
நெல்லை மாவட்டம் சீவலப்பேரியில் புகழ்பெற்ற சுடலை கோயிலை நிர்வகிப்பதில் இரு சமூகத்தினர் இடையே நிலவி வரும் மோதலால் கோயில் பூசாரி சிதம்பரம் கடந்த ஆண்டு ஏப்ரல் மாதம் வெட்டி கொலை செய்யப்பட்டார்.
இதனால் மோதல் உச்சகட்டம் அடைந்த நிலையில் ஓராண்டு இடைவெளிக்கு பிறகு கடந்த பத்தாம் தேதி ஏற்கனவே உயிரிழந்த பூசாரியின் உறவினரான மாயாண்டி கும்பலால் வெட்டி படுகொலை செய்யப்பட்டார். பூசாரி வழக்கில் மாயாண்டி உதவியாக இருந்த காரணத்தாலயே மாயாண்டி கொலை செய்யப்பட்டதாக காவல்துறை தரப்பில் கூறப்பட்டது.
ஒரே சமூகத்தைச் சேர்ந்த இருவர் அடுத்தடுத்து கொலை செய்யப்பட்ட சம்பவம் நெல்லையில் பெரும் பதற்றத்தை ஏற்படுத்தியது. உயிரிழந்த பூசாரி சிதம்பரம் மற்றும் மாயாண்டியின் குடும்பத்திற்கு நீதி கேட்டு உடலை வாங்க மறுத்து உறவினர்கள் மற்றும் சமுதாய அமைப்பினர் கடந்த ஐந்து நாட்களாக தொடர் போராட்டம் நடத்தினர்.
குறிப்பாக நேற்று முன்தினம் 300க்கும் மேற்பட்டோர் மாவட்ட ஆட்சியர் அலுவலகத்தை முற்றுகையிட்டு சாலை மறியல் மற்றும் பேருந்து உடைப்பு போராட்டத்தால் பதட்டம் தொடர்ந்தது. போராட்டத்தை முடிவுக்கு கொண்டு வர முடியாமல் திணறிய காவல்துறையினர் நேற்று சபாநாயகர் அப்பாவு உதவியை நாடினர். அதன்படி சபாநாயகர் தலைமையில் நேற்று நடைபெற்ற பேச்சு வார்த்தையில் உடன்பாடு ஏற்பட்டது. இதில் உறவினர்களின் முக்கிய கோரிக்கையான இருவரது குடும்பத்தில் ஒருவருக்கு அரசு வேலை வழங்குவது மற்றும் இலவச வீட்டு மனை பட்டா உள்ளிட்ட கோரிக்கைகளை நிறைவேற்றி தர நடவடிக்கை எடுப்பதாக சபாநாயகர் உறுதி அளித்து அதைத்தொடர்ந்து நேற்று உடலை வாங்க உறவினர்கள் சம்மதித்தனர்.
இதனால் ஐந்து நாட்களாக நீடித்த நெல்லை போராட்டம் முடிவுக்கு வந்தது. இதைத் தொடர்ந்து இன்று நெல்லை அரசு மருத்துவக் கல்லூரி மருத்துவமனையில் உடற்கூறாய்வு செய்யப்பட்டு வைக்கப்பட்டிருந்த மாயாண்டியின் உடல் உறவினர்களிடம் ஒப்படைக்கப்பட்டது.
உடலை பெற்றுக் கொண்ட உறவினர்கள் சொந்த ஊரில் அடக்கம் செய்வதற்காக சீவலப்பேரி எடுத்து செல்கின்றனர். முன்னெச்சரிக்கையாக இன்று நெல்லை அரசு மருத்துவமனையை சுற்றி காவல் கண்காணிப்பாளர் துணை ஆணையர்கள் தலைமையில் சுமார் 500 போலீசார் குவிக்கப்பட்டனர். பிரச்சனை ஏதும் இல்லாமல் உறவினர்கள் உடலை பெற்று சென்றதால் நெல்லை காவல்துறையினர் நிம்மதி அடைந்துள்ளனர்.