சென்னை வியாசர்பாடியை சேர்ந்த இளம் கால்பந்து வீராங்கனை பிரியா மூட்டு வலி காரணமாக அரசு மருத்துவமனையில் அனுமதிக்கப்பட்டிருந்தார். இதையடுத்து நடந்த அறுவை சிகிச்சையில் காலை அகற்ற வேண்டிய கட்டாயம் ஏற்பட்டது. இதன் தொடர்ச்சியாக மருத்துவர்கள் சரியான முறையில் கட்டு போடவில்லை என்று தெரிகிறது. இதனால் கால் வீக்கம் ஏற்பட்டது.
உடனே மேல்சிகிச்சைக்காக ராஜீவ் காந்தி அரசு மருத்துவமனையில் அனுமதிக்கப்பட்டார். தீவிர சிகிச்சை அளிக்கப்பட்டு வந்த நிலையில் நேற்று காலை திடீரென உயிரிழந்தார். இது ஒட்டுமொத்த தமிழகத்திலும் அதிர்வலைகளை ஏற்படுத்தியது. தகவலறிந்து உடனடியாக விசாரணைக் குழு ஒன்றை அமைத்தது தமிழக அரசு. சுகாதாரத்துறை அமைச்சர் மா.சுப்பிரமணியன் உரிய விளக்கம் கொடுத்தார்.
இதற்கிடையில் பிரியாவின் உடலை வாங்க மறுத்து அவரது உறவினர்கள், தோழிகள் ஆர்ப்பாட்டத்தில் ஈடுபட்டனர். பின்னர் சமாதானப் பேச்சுவார்த்தையில் உடன்பாடு ஏற்பட்டு உடலை பெற்று கொண்டனர். பிரியாவின் இறுதிச் சடங்கில் ஏராளமானோர் பங்கேற்று அஞ்சலி செலுத்தினர். இதற்கிடையில் சம்பந்தப்பட்ட இரண்டு மருத்துவர்களும் பணியிடை நீக்கம், பணியிடமாற்றம் செய்யப்பட்டனர்.
அவர்கள் மீது சட்டப்பூர்வ மற்றும் துறை ரீதியான நடவடிக்கை எடுக்கப்படும் என்றும் தெரிவிக்கப்பட்டது. பிரியாவின் குடும்பத்திற்கு 10 லட்ச ரூபாய் நிவாரணம் மற்றும் குடும்பத்தில் ஒருவருக்கு அரசு வேலை வழங்கப்படும் என்று மக்கள் நல்வாழ்வுத்துறை அமைச்சர் மா.சுப்பிரமணியன் தெரிவித்திருந்தார். இந்நிலையில் வியாசர்பாடியில் உள்ள பிரியாவின் வீட்டிற்கு முதல்வர்
இன்று காலை நேரில் சென்றார்.
அப்போது, பிரியாவின் குடும்பத்திற்கு ஆறுதல் கூறினார். மேலும் அரசு பணிக்கான உத்தரவு, 10 லட்ச ரூபாய்க்கான காசோலை, அரசு சார்பில் வீடு ஒதுக்கியதற்கான ஆணை ஆகியவற்றை பிரியாவின் பெற்றோருக்கு முதல்வர் மு.க.ஸ்டாலின் வழங்கினார். அப்போது அமைச்சர்கள் மா.சுப்பிரமணியன், சேகர் பாபு, சென்னை மாநகராட்சி மேயர் பிரியா, சட்டமன்ற உறுப்பினர்கள் மற்றும் அதிகாரிகள் உடனிருந்தனர்.
முன்னதாக சென்னை கால்பந்து வீராங்கனை பிரியாவின் மரணம் தொடர்பாக விசாரணை நடத்தி அறிக்கை தாக்கல் செய்யுமாறு மாநில மனித உரிமைகள் ஆணையம் உத்தரவிட்டுள்ளது. இதுதொடர்பான விரிவான அறிக்கையை 6 வாரங்களில் தாக்கல் செய்ய சுகாதாரம் மற்றும் மக்கள் நல்வாழ்வுத்துறை செயலாளருக்கு நோட்டீஸ் அனுப்பப்பட்டுள்ளது.