“இந்தியாவை வளர்ந்த நாடாக மாற்ற உறுதி ஏற்க வேண்டும்,” என, பிரதமர் நரேந்திர மோடி தெரிவித்து உள்ளார்.
அடுத்த ஒன்றரை ஆண்டுகளில், 10 லட்சம் பேருக்கு வேலைவாய்ப்பு அளிக்குமாறு அனைத்து மத்திய அரசு துறைகளையும் பிரதமர் நரேந்திர மோடி கடந்த ஜூன் மாதம் கேட்டுக் கொண்டார். அதைத் தொடர்ந்து, கடந்த அக்டோபர் மாதம், புதிதாக தேர்ந்தெடுக்கப்பட்ட 75 ஆயிரம் பேருக்கு பிரதமர் நரேந்திர மோடி பணி நியமன கடிதங்களை வழங்கினார்.
இந்த நிலையில், மத்திய அரசின் ரோஜ்கார் மேளா (வேலைவாய்ப்பு கண்காட்சி) இன்று நடைபெற்றது. அதில், காணொலி காட்சி மூலமாக கலந்து கொண்ட பிரதமர் நரேந்திர மோடி சுமார் 71 ஆயிரம் பேருக்கு பணி நியமன கடிதங்களை வழங்கினார்.
இந்த நிகழ்ச்சியில் பிரதமர் நரேந்திர மோடி பேசியதாவது:
இந்த சிறப்பான தருணத்தில் உங்களுக்கு புதிய பொறுப்பு கிடைத்துள்ளது. இந்தியா சுதந்திரம் பெற்று 75 ஆண்டுகள் நிறைவு பெற்றுள்ளதை கொண்டாடும் இந்த நேரத்தில், இந்தியாவை வளர்ந்த நாடாக மாற்ற வேண்டும் என குடிமக்கள் அனைவரும் உறுதிபூண்டுள்ளனர். அமிர்த காலத்திற்குள் இந்தியா நுழைந்துள்ளது. இந்த நேரத்தில் இந்தியாவை ஒரு வளர்ந்த நாடாக மாற்ற அனைவரும் உறுதி ஏற்க வேண்டும்.
அந்த உறுதிமொழியை மெய்ப்பிக்க நீங்கள் அனைவரும் தான் “சாரதியாக” செயல்பட வேண்டும். நாட்டின் மற்ற மக்கள் முன்பு, மத்திய அரசின் பிரதிநிதிகளில் ஒருவராக நியமிக்கப்பட்டு அந்த புதிய பொறுப்பு உங்களின் தோளில் ஏறியுள்ளது.
இந்தியாவின் வளர்ச்சிப் பாதையில் உலக வல்லுநர்கள் நம்பிக்கையுடன் உள்ளனர். விண்வெளித் துறையில் தனியார் பங்களிப்பால் இளைஞர்கள் பலன்களை பெறுகின்றனர். இந்தியாவில் இளைஞர்களுக்கு புதிய வாய்ப்புகள் உருவாக்கப்படுகின்றன. கோவிட் பெருந்தொற்று மற்றும் போர் நடக்கும் மத்தியில், உலகம் முழுவதும் இளைஞர்களுக்கு புதிய வாய்ப்பு கிடைப்பதில் பிரச்னையாக உள்ளது.
வளர்ந்த நாடுகளிலும் பெரிய பிரச்னை உள்ளது என நிபுணர்கள் கருதுகின்றனர். இது போன்ற நேரங்களிலும், பொருளாதார திறமைகள் மற்றும் புதிய வாய்ப்புகளை வெளிப்படுத்துவதில், இந்தியாவிற்கு பொன்னான வாய்ப்பு கிடைத்துள்ளது என பொருளாதார வல்லுநர்கள் மற்றும் நிபுணர்களும் கூறுகின்றனர்.
இவ்வாறு பிரதமர் நரேந்திர மோடி பேசினார்.