உத்தர பிரதேச மாநிலத்தில் பறிமுதல் செய்யப்பட்ட 581 கிலோ கஞ்சாவை எலி சாப்பிட்டு விட்டதாக, மதுரா காவல் துறையினர், நீதிமன்றத்தில் தெரிவித்துள்ளது, பரபரப்பை ஏற்படுத்தி உள்ளது.
உத்தர பிரதேச மாநிலம் மதுரா காவல் நிலையத்தில் கடந்த சில ஆண்டுகளில் மட்டும் சுமார் 700 கிலோ கஞ்சாக்கள் பறிமுதல் செய்து வைக்கப்பட்டு உள்ளன. குறிப்பாக, 2018 மற்றும் 2019 ஆம் ஆண்டுகளில் மதுரா காவல் துறை நெடுஞ்சாலையில் நடத்திய மெகா கஞ்சா வேட்டையில் 581 கிலோ கஞ்சாக்கள் கடத்தல்காரர்களிடம் இருந்து போலீசார் பறிமுதல் செய்தனர். கடத்தல்காரர்கள் மீது போதை பொருள் தடுப்பு சட்டத்தின் கீழ் வழக்குப் பதிவு செய்து நீதிமன்றத்தில் வழக்கு விசாரணை நடைபெற்று வருகிறது.
விசாரணை இறுதிக் கட்டத்தை அடைந்துள்ள நிலையில், குற்றத்தை நிரூபணம் செய்து தண்டனையை அறிவிக்க பறிமுதல் செய்த கஞ்சாவை சமர்ப்பிக்க வேண்டும் என மதுரா காவல் துறையினருக்கு, நீதிமன்றம் உத்தரவு பிறப்பித்திருந்தது.
இதைத் தொடர்ந்து கஞ்சாவின் மாதிரிகளை நீதிமன்றத்தில் மதுரா காவல் துறையினர் சமர்ப்பித்தனர். ஆனால், இதை ஏற்க முடியாது; பறிமுதல் செய்யப்பட்ட 581 கிலோ கஞ்சாவையும் நீதிமன்றத்தில் சமர்ப்பிக்க வேண்டும் என்று நீதிமன்றம் உத்தரவிட்டது. இதைத் தொடர்ந்து மதுரா காவல் துறையினர் நீதிமன்றத்தில் அளித்த பதில் தான் நீதிபதிகள் உட்பட அனைவரையும் திக்குமுக்காடச் செய்தது.
மதுரா காவல் நிலைய ஸ்டோர் ரூம்மில் எலி தொல்லை அதிகமாக இருப்பதாகவும், அந்த எலிக்கள் கிலோக கணக்கில் இருந்த கஞ்சா அனைத்தையும் சாப்பிட்டு விட்டதாகவும், எனவே 581 கிலோ கஞ்சாவை ஆதாரமாக சமர்ப்பிக்க முடியவில்லை எனவும் போலீசார் தெரிவித்தனர்.
இதனை கேட்டு நீதிபதிகள் அதிர்ந்து போயினர். இது தொடர்பாக நடத்திய தீவிர விசாரணையில், பறிமுதல் செய்த போதை பொருட்களை நீதிமன்றத்தில் ஒப்படைக்க கூறிய போது, அதனை வேறொருவரிடத்தில் அதிக விலைக்கு விற்று விட்டு எலிகளின் மீது பழி சுமத்தியது விசாரணையில் தெரிய வந்தது.
இதே போல் 2017 ஆம் ஆண்டு பீகார் மாநில காவல் துறை பறிமுதல் செய்து வைத்திருந்த ஆயிரக்கணக்கான லிட்டர் சாராயத்தை எலிகள் குடித்து காலி செய்து விட்டதாக பரபரப்பு புகாரை தெரிவித்திருந்தது குறிப்பிடத்தக்கது.