அவதார் 2 – முதல் வார இறுதியில் 100 கோடியைக் கடந்த வசூல்
ஜேம்ஸ் கேமரூன் இயக்கத்தில் கடந்த வாரம் டிசம்பர் 16ம் தேதி வெளிவந்த படம் 'அவதார் – த வே ஆப் வாட்டர்'. உலக அளவில் பெரும் எதர்பார்ப்பை ஏற்படுத்திய இந்தப் படம் இந்தியாவில் ஆங்கிலம், தமிழ், ஹிந்தி, கன்னடம், தெலுங்கு, மலையாளம் ஆகிய மொழிகளில் வெளியாகி உள்ளது.
முதல் நாளிலேயே முன்னணி நடிகர்களின் படங்களைப் போல அதிகாலை காட்சிகள் மட்டுமல்ல நள்ளிரவு 12 மணிக்கும் சிறப்புக் காட்சிகள் திரையிடப்பட்டது. முதல் வார இறுதி வசூலாக இந்தப் படம் 100 கோடியைக் கடந்து 130 கோடி வசூலை வசூலித்துள்ளதாக பாக்ஸ் ஆபீஸ் வட்டாரங்கள் தெரிவிக்கின்றன.
அதே சமயம் இந்தியாவில் வெளியான ஹாலிவுட் படங்களில் முதல் வார இறுதி வசூலாக 'அவெஞ்சர்ஸ் என்ட்கேம்' படம் வசூலித்த 155 கோடி வசூலை 'அவதார் 2' வசூல் முறியடிக்கவில்லை என்பது ஏமாற்றத்தைத் தந்துள்ளது. அரையாண்டுத் தேர்வுகள் நடந்து வருவதால்தான் அந்த வசூல் பாதிப்பு என்கிறார்கள். இந்த வார நாட்களில் படம் தாக்குப் பிடித்துவிட்டால் இந்த வார இறுதி, அடுத்த வாரம் அரையாண்டு விடுமுறை என வசூல் இன்னும் அதிகமாக வாய்ப்புள்ளது.