வீடியோகான் குழுமத்திற்கு முறைகேடாக கடன் வழங்கிய வழக்கில், ஐசிஐசிஐ வங்கியின் முன்னாள் நிர்வாக இயக்குனர் மற்றும் தலைமை செயல் அதிகாரி சந்தா கோச்சார், அவரது கணவர் தீபக் கோச்சார் ஆகியோரை சிபிஐ அதிகாரிகள் கைது செய்துள்ளனர்.
ஐசிஐசிஐ வங்கியின் தலைமை செயல் அதிகாரியாகப் பணியாற்றி வந்த சந்தா கோச்சார், அவருடைய பதவிக் காலத்தில் தன்னுடைய அதிகாரத்தைத் தவறாகப் பயன்படுத்தி வீடியோகான் குழுமத்துக்கு 3,250 கோடி ரூபாய் கடன் வழங்கினார். கடன் வழங்குவதற்கான எந்தவித விதிமுறைகளையும் பின்பற்றாமல், சுய ஆதாயம் தேடிக் கொள்வதற்காக சந்தா கோச்சார் இந்தக் கடனை வழங்கினார்.
இந்தக் கடன் வங்கியின் வாராக்கடனாக அறியப்பட்ட பிறகே இந்த விவகாரத்தில் நடந்திருக்கும் ஊழல் வெளிச்சத்துக்கு வந்தது. சந்தா கோச்சார், அவருடைய கணவர் தீபக் கோச்சார் மூலம் வீடியோகானுக்கு முறைகேடாகக் கடன் வழங்கி அதன் மூலம் பல கோடி ரூபாய் ஆதாயம் அடைந்திருக்கிறார். இந்தக் குற்றச்சாட்டு எழுந்து விசாரணைக்கு உத்தரவிடப்பட்ட பிறகு சந்தா கோச்சார் தனது பதவியை ராஜினாமா செய்தார். பின்னர் வங்கி இயக்குனர் குழு அவரை பணிநீக்கம் செய்தது.
இதை அடுத்து ஐசிஐசிஐ – வீடியோகான் கடன் மோசடி விவகாரத்தில், சட்ட விரோதப் பணப் பரிமாற்றம் தொடர்பாக வழக்குப் பதிவு செய்து சிபிஐ விசாரித்து வருகிறது. மேலும், இந்த வழக்கில் குற்றப் பத்திரிகையும் நீதிமன்றத்தில் தாக்கல் செய்யப்பட்டு இருக்கிறது.
இந்நிலையில் இன்று, வீடியோகான் குழுமத்திற்கு முறைகேடாக கடன் வழங்கிய வழக்கில், ஐசிஐசிஐ வங்கியின் முன்னாள் நிர்வாக இயக்குனர் மற்றும் தலைமை செயல் அதிகாரி சந்தா கோச்சார், அவரது கணவர் தீபக் கோச்சார் ஆகியோரை சிபிஐ அதிகாரிகள் கைது செய்துள்ளனர்.