டெல்லியில், அனைத்து அரசுப் பள்ளி மாணவர்களுக்கு, அடுத்த ஆண்டு ஜனவரி மாதம் 1 ஆம் தேதி முதல் 15 ஆம் தேதி வரை குளிர் கால விடுமுறை அளித்து அம்மாநில அரசு உத்தரவு பிறப்பித்து உள்ளது.
தலைநகர் டெல்லியில், முதலமைச்சர் அரவிந்த் கெஜ்ரிவால் தலைமையிலான ஆம் ஆத்மி கட்சியின் ஆட்சி நடைபெற்று வருகிறது. இந்த மாநிலத்தில் தற்போது கடும் பனிமூட்டம் நிலவி வருகிறது. இதனால், அதிகாலையில் வாகனங்கள் முகப்பு விளக்குகளை எரிய விட்டபடி செல்கின்றன.
இதனால், விமான சேவை மற்றும் ரயில் போக்குவரத்தும் பாதிக்கப்பட்டு உள்ளது. மேலும், கடுங்குளிர் நிலவுவதால் பொது மக்களும் கடுமையாக பாதிக்கப்பட்டு வருகின்றனர். ஏற்கனவே, காற்று மாசு காரணமாக பாதிக்கப்படும் டெல்லி மக்களுக்கு, கடுங்குளிர் மேலும் சிரமத்தை ஏற்படுத்தி இருக்கிறது.
இந்நிலையில், அனைத்து அரசுப் பள்ளிகளுக்கும், அடுத்த ஆண்டு ஜனவரி மாதம் 1 ஆம் தேதி முதல் 15 ஆம் தேதி வரை குளிர் கால விடுமுறை அளித்து டெல்லி மாநில கல்வித் துறை உத்தரவு பிறப்பித்து உள்ளது.
இது குறித்து டெல்லி கல்வித் துறை வெளியிட்டுள்ள அறிக்கையில் கூறி இருப்பதாவது:
மாநில கல்வி இயக்குனரகத்தின் கீழ் உள்ள அனைத்து அரசுப் பள்ளிகளுக்கும் 2023 ஆம் ஆண்டு ஜனவரி மாதம் 1 ஆம் தேதி முதல் 15 ஆம் தேதி வரை குளிர் கால விடுமுறை அளிக்கப்படுகிறது. எனினும், ஜனவரி மாதம் 2 ஆம் தேதி முதல் 14 ஆம் தேதி வரை 9 ஆம் வகுப்பு முதல் 12 ஆம் வகுப்பு வரை சிறப்பு வகுப்புகள் நடைபெறும்.
மாணவர்களின் கல்வித் திறனை மேம்படுத்துவதற்காக சிறப்பு வகுப்புகள் நடத்தப்படும். மேலும், பொதுத் தேர்வுக்கு இந்த சிறப்பு வகுப்புகள் பேருதவியாக இருக்கும்.
இவ்வாறு அதில் தெரிவிக்கப்பட்டு உள்ளது.