சிக்கிம்: சிக்கிம் மாநிலத்தில் ராணுவ வாகன விபத்தில் 16 ராணுவ வீரர்கள் உயிரிழந்தனர். சாட்டன் என்ற இடத்தில் இருந்து தாங்கு என்ற இடத்திற்கு சென்று கொண்டிருந்த போது ராணுவ வாகனம் ஒன்று விபத்துக்குள்ளானது. வடக்கு சிக்கிமில் உள்ள ஜெமா என்ற இடத்தில் வீரர்கள் சென்ற வாகனம் கட்டுப்பாட்டை இழந்து பள்ளத்தில் விழுந்து நொறுங்கியது. வாகனம் பள்ளத்தில் விழுந்து நொறுங்கியதில் 16 வீரர்கள் வீர மரணம் அடைந்துள்ளதாக அதிகாரபூர்வமாக அறிவிக்கப்பட்டுள்ளது.
விபத்தில் சிக்கிய மேலும் 4 வீரர்கள் உடனடியாக மீட்கப்பட்டு மருத்துவமனைக்கு அனுப்பி வைக்கப்பட்டனர். அங்கு அவர்களுக்கு சிகிச்சை அளிக்கப்பட்டு வருகிறது. வளைவில் திரும்பும் போது கட்டுப்பாட்டை இழந்து பள்ளத்தில் விழுந்து ராணுவ வாகனம் நொறுங்கியதாக கூறப்படுகிறது. வாகன விபத்தில் 16 ராணுவ வீரர்கள் உயிரிழந்திருப்பது அதிர்ச்சியை ஏற்படுத்தியுள்ளது. இது தொடர்பாக இந்திய ராணுவம் தரப்பில் இரங்கல் தெரிவிக்கப்பட்டுள்ளது.
16 வீரர்கள் வீர மரணம்: ராஜ்நாத் சிங் வேதனை
வடக்கு சிக்கிமில் ராணுவ வாகன விபத்தில் 16 வீரர்கள் வீரமரணம் அடைந்த சம்பவம் மிகுந்த வேதனை அளிக்கிறது என்று ஒன்றிய அமைச்சர் ராஜ்நாத் சிங் வேதனை தெரிவித்திருக்கிறார். ராணுவ வீரர்களின் சேவை மற்றும் அர்பணிப்புக்காக தேசம் ஆழ்ந்த நன்றியுடன் உள்ளது. காயமடைந்த வீரர்கள் விரைவில் குணமடைய வேண்டுகிறேன் என பாதுகாப்புத்துறை அமைச்சர் ராஜ்நாத் ட்வீட் செய்துள்ளார்.