பிரதமர் மோடியின் தாயார் ஹீராபென் இன்று காலை உயிரிழந்தது பெரும் சோகத்தை ஏற்படுத்தியுள்ளது. இவருக்கு வயது 100. இதையடுத்து டெல்லியில் இருந்து உடனடியாக குஜராத் மாநிலம் காந்தி நகருக்கு மோடி விரைந்தார். அங்கு தாயாரின் உடலை சுமந்து சென்று இறுதிச் சடங்குகளை செய்தார். பின்னர் ஹீராபென்னின் உடல் தகனம் செய்யப்பட்டது. இதையடுத்து இன்றைய அரசு நிகழ்ச்சிகளை பிரதமர் அலுவலகம் ஒத்திவைக்கலாம் என எதிர்பார்க்கப்பட்டது.
பிரதமர் மோடிக்கு இரங்கல்
ஆனால் வீடியோ கான்பரன்சிங் மூலம் பிரதமர் மோடி கலந்து கொண்டு வருகிறார். இதற்கிடையில் பிரதமர் மோடிக்கு பல்வேறு அரசியல் கட்சி தலைவர்களும் இரங்கல் தெரிவித்து வருகின்றனர். பாஜகவை சேர்ந்த நிர்வாகிகள், மத்திய அமைச்சர்கள் உள்ளிட்டோர் நேரில் சென்று அஞ்சலி செலுத்த திட்டமிட்டுள்ளனர். தமிழகத்தில் இருந்து முதல்வர் மு.க.ஸ்டாலின், எடப்பாடி பழனிசாமி உள்ளிட்டோர் நேரில் சென்று இரங்கல் தெரிவிக்க முடிவு செய்திருப்பதாக தகவல்கள் தெரிவிக்கின்றன.
பாஜக அலுவலகங்களில் அஞ்சலி
இதற்கிடையில் தமிழகத்தில் உள்ள அனைத்து பாஜக அலுவலகங்களிலும் பிரதமர் மோடியின் தாயார் ஹீராபென்னின் திருவுருவப் படத்திற்கு அஞ்சலி செலுத்த மாநிலத் தலைவர் அண்ணாமலை அறிவுறுத்தியுள்ளார். இதற்கான ஏற்பாடுகளை உடனடியாக செய்யுமாறு உத்தரவு பிறப்பிக்கப்பட்டுள்ளது. அந்த வகையில் கோவையில் உள்ள பாஜக அலுவலகத்திலும் ஏற்பாடுகள் செய்யப்பட்டு வருகின்றன.
கோவை தெற்கு சட்டமன்ற அலுவலகம்
இந்நிலையில் தெற்கு சட்டமன்ற உறுப்பினர் அலுவலகத்தில் நடந்த விஷயம் பலரை கவர்ந்துள்ளது. இந்த தொகுதியில் பாஜகவை சேர்ந்த
எம்.எல்.ஏவாக இருக்கிறார். இந்த சூழலில் தனது சட்டமன்ற உறுப்பினர் அலுவலகத்தில் தீப அஞ்சலி செலுத்த திட்டமிட்டுள்ளார். இதில் பாஜகவினர் பலரும் கலந்து கொள்கின்றனர்.
மாற்றுத்திறனாளி அசத்தல்
ஒருபக்கம் அஞ்சலிக்கான ஏற்பாடுகள் நடைபெற்று வரும் நிலையில், மறுபக்கம் மாற்றுத்திறனாளி ஒருவர் ஹீராபென்னின் ஓவியத்தை அற்புதமாக தரையில் வரைந்து ஆச்சரியத்தில் ஆழ்த்தியுள்ளது. இவர் அம்மன்குளம் பகுதியை சேர்ந்த சங்கர் என்பது குறிப்பிடத்தக்கது. ஓவியம் வரைவதில் மிகுந்த ஆர்வம் கொண்டிருந்த இவர், ஹீராபென்னிற்கு அஞ்சலி செலுத்தும் விதமாக இப்படி ஒரு விஷயத்தை செய்துள்ளார்.
பூரி கடற்கரையில் மணல் சிற்பம்
அவரை பலரும் பாராட்டி வருகின்றனர். சங்கர் வரைந்த ஓவியம் தற்போது சமூக வலைதளங்களில் வைரலாகி கொண்டிருக்கிறது. முன்னதாக ஒடிசாவில் பிரபல மணல் சிற்பக்கலைஞர் சுதர்சன் பட்நாயக், பூரி கடற்கரையில் ஹீராபென்னின் உருவத்தை அற்புதமாக செதுக்கியுள்ளார். அதில் ஓம் சாந்தி என்று எழுதி விளக்கு ஒன்று ஒளிர்வதை போல் வடிவமைத்துள்ளார். ஹீராபென்னை சுற்றி மேகங்கள் சூழ்ந்திருப்பது போல் காட்சிப்படுத்தி இருக்கிறார். இது காண்போரை பெரிதும் கவர்ந்து வருகிறது.