முதல்வர் ஸ்டாலின் மகன் உதயநிதி ஸ்டாலின். கடந்த 2021ம் ஆண்டு நடந்த சட்ட பேரவை தேர்தலில் சேப்பாக்கம்-திருவல்லிக்கேணி தொகுதியில் இருந்து
இளைஞர் அணி செயலாளராக உள்ள
எம்எல்ஏவாக தேர்வு செய்யப்பட்டார்.
இதையடுத்து உதயநிதி ஸ்டாலினுக்கு அமைச்சர் பதவி வழங்க வேண்டும் என்று அன்பில் மகேஷ் பொய்யாமொழி, பிகே சேகர் பாபு உள்பட திமுக அமைச்சர்கள் மட்டுமல்லாமல் மூத்த நிர்வாகிகளும் தொடர்ந்து கோரிக்கை விடுத்து வந்தனர்.
இதனால் உதயநிதி ஸ்டாலின் எந்த நேரத்திலும் அமைச்சரவையில் இடம் பிடிக்கலாம் என்கிற எதிர்பார்ப்பு தமிழக அரசியலில் நிலவி வந்தது. அதே சமயம் திமுக மேலிடம் இந்த விவகாரத்தில் மவுனம் காத்து வந்ததால் கண்டிப்பாக உதயநிதி ஸ்டாலின் அமைச்சராக பொறுப்பேற்பார் என பரவலாக பேசப்பட்டது.
இந்நிலையில், யாருமே எதிர்பாராத வகையில் உதயநிதி ஸ்டாலின் அமைச்சராக பொறுப்பேற்பார் என, திடீரென தகவல்கள் வெளியானதால் திமுக நிர்வாகிகள் வட்டாரத்தில் பரபரப்பான சூழல் நிலவியது.
அதே சமயம் அதிமுக, பாஜக உள்பட எதிர்க்கட்சிகளும் உதயநிதி ஸ்டாலினுக்கு அமைச்சர் பதவி வழங்குவது குறித்து கடுமை காட்டி பேசின. குறிப்பாக எடப்பாடி பழனிச்சாமி கண்டபடி விமர்சனம் செய்தார்.
இந்த பரபரப்பான சூழலில் உதயநிதி ஸ்டாலின் தமிழக இளைஞர் நலன் மற்றும் விளையாட்டு துறை அமைச்சராக பதவியேற்று கொண்டார். முன்னதாக அவருக்கு பதவி பிரமாணமும், ரகசிய காப்பு பிரமாணமும் ஆளுநர் ஆர்.என்.ரவி செய்து வைத்து வாழ்த்தினார்.
இதன் தொடர்ச்சியாக தமிழகம் முழுவதும் பல்வேறு விமர்சனங்கள் முன்வைக்கப்பட்டு வருகின்றன. திமுகவின் வெற்றிக்காகவும் வளர்ச்சிக்காகவும் எத்தனையோ முன்னோடிகள் கடுமையாக உழைத்து இருப்பதாகவும், அவர்கள் நிலை மிகவும் பரிதாபமாக இருப்பதாகவும் குற்றச்சாட்டுகள் வைக்கப்பட்டு வருகின்றன.
இந்நிலையில் உதயநிதி ஸ்டாலினுக்கு துணை முதல்வர் பதவி தொடர்பாக பரபரப்பான தகவல் ஒன்றை செய்தித்துறை அமைச்சர் சாமிநாதன் வெளியிட்டிருப்பது முக்கியத்துவம் வாய்ந்ததாக பார்க்கப்படுகிறது.
திருப்பூர் மாவட்டம் பல்லடம் நகராட்சிக்கு உட்பட்ட வடுகபாளையத்தில் கலைஞர் நகர்புற மேம்பாட்டு திட்டத்தின் கீழ் சின்னையா கார்டன் பகுதியில் 90 லட்சம் ரூபாய் மதிப்பில் புதிய பூங்கா அமைக்கும் பணி நிறைவுற்ற நிலையில் பொதுமக்கள் பயன்பாட்டிற்காக இன்று திறந்து வைக்கப்பட்டது.
இதே போல் பல்லடம் அரசு மருத்துவமனையில் தேசிய நகர்ப்புற வாழ்வாதார இயக்கத்தின் கீழ் அரசு மருத்துவமனையில் நோயாளிகளுடன் வருபவர்கள் தங்கும் விடுதி 50 லட்சம் ரூபாய் மதிப்பில் அமைக்கப்பட்டது. அதுவும் இன்று பொதுமக்கள் பயன்பாட்டுக்கு திறந்து வைக்கப்பட்டது.
இந்த திட்ட பணிகளை தமிழக செய்தி துறை அமைச்சர் மு.பெ.சாமிநாதன் பொதுமக்கள் பயன்பாட்டிற்காக திறந்து வைத்தார். இந்த நிகழ்ச்சியில் மாவட்ட ஆட்சியர் வினீத், பல்லடம் நகர செயலாளர் ராஜேந்திர குமார் மற்றும் அரசு அதிகாரிகள் கட்சி நிர்வாகிகள் கலந்து கொண்டனர்.
இதை தொடர்ந்து தமிழக செய்தித்துறை அமைச்சர் மு.பெ.சாமிநாதன் செய்தியாளர்களை சந்தித்து கூறியதாவது:
பல்லடம் நகராட்சியில் தற்பொழுது மக்கள் தொகை அதிகரித்து வருவதால் புதிதாக இரண்டு நகர்புற மருத்துவமனைகள் அமைக்கப்படும். கலைஞரின் வருமுன் காப்போம் திட்டம், மக்களை தேடி மருத்துவம் ஆகியவை மிகச் சிறப்பாக செயல்பட்டு வருகின்றது.
ஒரு கோடி மக்கள் பயன் அடைந்த நிலையில் ஒரு கோடியே ஒன்னாவது நபருக்கு தமிழக முதல்வர் மருந்து பெட்டகத்தை வழங்கியுள்ளார். சாலையில் செல்லும் பொழுது வாகனத்தில் விபத்து ஏற்பட்டால் விபத்தில் சிக்கியவர்களை மருத்துவமனையில் அனுமதித்தது முதல் 48 மணி நேரத்திற்கு தமிழக அரசு சிகிச்சைக்கான முழு செலவை ஏற்று கொள்ளும்.
சர்க்கரை நோய் என்பது சாதாரணமாக குழந்தைகள் முதல் பெரியவர்கள் வரை உள்ளது. இதிலிருந்து அவர்களை காக்கும் பொருட்டு மக்களை தேடி மருத்துவம் திட்டம் செயல்பட்டு வருகின்றது.
அழகுமலை ஜல்லிக்கட்டு போட்டிக்கு ஒரு தரப்பு எதிர்ப்பு தெரிவித்து வரும் நிலையில் நீதிமன்ற உத்தரவின் அடிப்படையில் மாவட்ட நிர்வாகம் இதுகுறித்து உரிய முடிவு எடுக்கும்.
தனியார் இடத்தில் அவர்களின் அனுமதி பெற்று ஜல்லிக்கட்டு நடத்தவும் நடவடிக்கை எடுக்கப்பட்டு வருகின்றது. புதுப்படங்கள் குறித்து சமூக வலை தளங்களில் தவறாக பதிவு செய்பவர்கள் மீது மத்திய அரசு தான் நடவடிக்கை எடுக்க வேண்டும்.
உதயநிதி ஸ்டாலினை துணை முதல்வராக அன்பில் மகேஷ் பொய்யாமொழி முன்மொழிந்து இருந்தால் அதை நான் வழிமொழிகிறேன். இவ்வாறு தமிழக செய்தி துறை அமைச்சர் சாமிநாதன் தெரிவித்தார்.