மதுரை: தேசிய அளவிலான ஹாக்கி போட்டித் தொடரின் இறுதிப் போட்டியில் தமிழ்நாடு – மத்தியபிரதேசம் அணிகள் இன்று மோதுகின்றன. மதுரை ரேஸ்கோர்ஸ் மைதானத்தில் உள்ள செயற்கைப் புல்தரை மைதானத்தில் எஸ்பிஐ வங்கி அணிகளுக்கு இடையே தேசிய அளவிலான ஹாக்கி போட்டித் தொடர் நடந்து வருகிறது. நேற்று அரையிறுதிப் போட்டிகள் நடந்தன. முதல் போட்டியில் தமிழ்நாடு – ஐதராபாத் அணிகள் மோதின. தொடக்கம் முதலே ஆதிக்கம் செலுத்திய தமிழக வீரர்கள், ஒருங்கிணைந்து விளையாடி கோல் மழை பொழிந்தனர்.
பதில் கோல் அடிக்க ஐதராபாத் அணி மேற்கொண்ட முயற்சிகள் எதுவும் பலனளிக்கவில்லை. ஆட்ட நேர முடிவில் தமிழகம் 7-0 என்ற கோல் கணக்கில் அபாரமாக வென்று பைனலுக்கு முன்னேறியது. மற்றொரு அரையிறுதியில் மத்தியபிரதேசம் 5 – 3 என்ற கோல் கணக்கில் டெல்லி அணியை வீழ்த்தியது. சாம்பியன் யார் என்பதை தீர்மானிப்பதற்கான இறுதிப் போட்டியில் தமிழ்நாடு – மத்தியபிரதேசம் அணிகள் இன்று பலப்பரீட்சை நடத்துகின்றன.