பாஜக மாநில தலைவராக இருப்பவர் அண்ணாமலை. இவர், சமீப காலமாக செய்தியாளர் சந்திப்பில் பத்திரிகையாளர்களிடம் ஏடாகூடமாக பேசி சர்ச்சைகளில் சிக்குவதை வழக்கமாக செய்து வருகிறார்.
இது போதாதென்று கேடி ராகவன், மதன் ரவிச்சந்திரன், திருச்சி சூர்யா, டெய்சி சரண், காயத்ரி ரகுராம் என பாஜக பிரமுகர்கள் அடுத்தடுத்து, சர்ச்சையில் சிக்கிய காரணத்தால் கட்சியின் செல்வாக்கும் அதலபாதாளத்துக்கு சென்றுள்ளதாக பரவலாக பேசப்படுகிறது.
இந்த சூழலில் மீண்டும் பாஜக மாநில தலைவர் அண்ணாமலை பத்திரிகையாளர்களிடம் வாயை கொடுத்து அடுத்த பிரச்சனைக்கு பிள்ளையார் சுழி போட்டுள்ளது தமிழக அரசியலில் பரபரப்பை ஏற்படுத்தி உள்ளது.
பாஜக மாநில தலைவர் அண்ணாமலை இன்று செய்தியாளர்களை சந்தித்து பேசியபோது, பத்திரிகையாளர்கள் அண்ணாமலையை கேள்விகளால் நிலை குலைய செய்தனர்.
அதற்கு அண்ணாமலை, ‘ என்ன கேள்வி கேட்க உங்களுக்கு எப்படி உரிமை இருக்கோ, அதே கேள்வி கேட்கும் உரிமை எனக்கு இருக்கு. இங்க வர்றவங்க எல்லாம் கட்சியில யாரோ சொன்னாங்கன்னு தான் தூக்கிட்டு வர்றீங்க. உங்களுக்கு
கிட்ட கேள்வி கேட்க தைரியம் இருக்கா? கமலாலயம் வந்தால் மட்டும் எக்ஸ்ட்ரா தைரியம் வருது?
கட்சி சேனல் நடத்துறவங்க எல்லாம்.. என் கிட்ட பேசாதீங்க. டிஜிட்டல் மீடியா, யூடியூப், 4 லைக் போட வேண்டும், 4 ட்வீட் போட வேண்டும்னு 40,000 ரூபாய் கேமராவை வாங்கிட்டு வந்து பிரஸ் மீட்டில் உட்கார்ந்துட்டு பேசுறாங்க.
நீங்க பண்றது எவ்வளவு பெரிய அநியாயம் பாருங்க’ என்று பேசியதோடு, குறிப்பிட்ட டிவி நிருபரிடம், ‘உங்க சேனல் பேர் என்ன?’ என கேட்டதோடு மேலும் சில பத்திரிகையாளர்களை தனியாக ஆபிஸ் ரூம் வாருங்கள் பஞ்சாயத்து வைத்து கொள்வோம்’ என அழைத்து பரபரப்பை எகிறவிட்டுள்ளார்.
அதே சமயம் ‘நேரலையில் மக்கள் முன்னிலையில் கேட்கும் கேள்விகளுக்கு மக்கள் முன்னிலையிலேயே பதில் சொல்லுங்கள். ஏன் தனியாக அழைக்கிறீர்கள்’ என செய்தியாளர்கள் கேள்வி கேட்டதற்கு அண்ணாமலை பதில் சொல்லாமல் ஓட்டம் பிடித்தார்.
இவ்வாறாக அண்ணாமலை நடந்து கொண்டது ஒட்டுமொத்த பத்திரிகையாளர்கள் மத்தியில் அதிர்ச்சியை ஏற்படுத்தி உள்ளதோடு தமிழக அரசியல் வட்டாரத்திலும் பெரும் பரபரப்பை ஏற்படுத்தி உள்ளது.
இந்த சூழலில் திமுக எம்எல்ஏவை கைது செய்ய வேண்டும் என பாஜக மாநில தலைவர் அண்ணாமலை கோரிக்கை விடுத்து சர்ச்சை என்ற வண்டியை நைசாக வேற ரூட்டுக்கு திருப்ப முயற்சி செய்திருப்பது முக்கியத்துவம் வாய்ந்ததாக பார்க்கப்படுகிறது.
சென்னை தியாகராய நகரில் உள்ள பாஜக தலைமை அலுவலகத்தில், அண்ணாமலை முன்னிலையில் 30க்கும் மேற்பட்டோர் பாஜகவில் இணைந்தனர். இதன் பிறகு அண்ணாமலை செய்தியாளர்களிடம் கூறியதாவது:
புதுக்கோட்டை மாவட்டம், இறையூரில் பட்டியல் இன மக்களை கோயிலுக்குள் அனுமதிக்காதது போன்ற பிரச்சனைகள் நடந்து வரும் நிலையில், முதல்வர் ஸ்டாலின் குறிப்பிட்ட ஊருக்கு மூத்த அமைச்சர்களை அனுப்பி வைக்காதது ஏன்?
திமுக முன்னாள் எம்.பி மஸ்தான் மரணத்தில் சந்தேகம் இருக்கிறது. தமிழ்நாட்டில் சட்டம் ஒழுங்கு சீர்குலைந்து இருக்கின்றது. சென்னை ஆர்.கே நகரில் மாநகராட்சி பணியாளரை வெறும் கையினால் கழிவு நீரை அகற்ற வைத்த திமுக எம்எல்ஏ எபினேசர் மீது வன்கொடுமை தடுப்புச் சட்டத்தின் கீழ் வழக்கு பதிவு செய்ய வேண்டும்.
இவ்வாறு அண்ணாமலை பேசி இருப்பது, எந்த வகையில் உண்மை? என்று தெரியாவிட்டாலும், தனக்கு எதிராக கொழுந்துவிட்டு எரியும் பிரச்சனையை திசை திருப்ப அண்ணாமலை முயற்சி செய்வதாகவே பரவலாக பேசப்படுகிறது.