வால்பாறை: வால்பாறை அருகே வனத்தில் இருந்து வெளியேறிய 3 யானைகள் தொழிலாளி வீட்டை உடைத்து சேதப்படுத்தியது. வால்பாறையை அடுத்து உள்ளது பெரியகல்லார் எஸ்டேட். நேற்று அதிகாலை வனத்திற்குள் இருந்து வெளியேறிய 3 காட்டு யானைகள் தோட்ட தொழிலாளர்கள் குடியிருப்பு பகுதியில் புகுந்து உணவு தேடி உள்ளது.
இதில் 2 வீடுகளை இடித்து உணவு தேடியதால் பரபரப்பு நிலவியது. நள்ளிரவில் சவுந்திரபாண்டி என்பவர் வீட்டில் இருந்தவர்கள் யானையிடம் தப்பிக்க வெளியே ஓடி, அருகில் உள்ள வீடுகளில் தஞ்சம் அடைந்து உயிர் தப்பினர். மேலும் வனத்துறை முகாமின் 2 ஜன்னல்களையும் காட்டு யானைகள் இடித்து தள்ளி உணவு தேடி உள்ளது. தொடர்ந்து அதே பகுதியில் யானைகள் உள்ளதால் வனத்துறையினர் உரிய பாதுகாப்பு அளிக்க வேண்டும் என அப்பகுதி மக்கள் கோரிக்கை விடுத்து உள்ளனர்.