போபால்: மத்தியப்பிரதேசத்தில் கோயில் மீது விமானம் மோதியதில் விமானி உயிரிழந்தார். மத்தியப்பிரதேசத்தின் ரேவா மாவட்டத்தில் தனியார் விமான பயிற்சி மையத்தை சேர்ந்த விமானம் நேற்று முன்தினம் இரவு வழக்கம்போல் பயிற்சியில் ஈடுபட்டு இருந்தது. இதில் விமானி மற்றும் பயிற்சி விமானி ஆகிய இரண்டு பேர் இருந்தனர். இந்நிலையில் இரவு 11.30மணியளவில் விமானத்தை தரையிறக்குவதற்கு விமானி முயற்சித்துள்ளார். அடர்ந்த பனிமூட்டம் காரணமாக விமானம் அருகில் இருந்த கோயில் மீது மோதி கீழே விழுந்து நொறுங்கியது. இதில் இருந்த பாட்னாவை சேர்ந்த விமான கேப்டன் விமல் குமார்(50) உயிரிழந்தார். ஜெய்ப்பூரை சேர்ந்த பயிற்சி விமானி சோனு யாதவ்(23) படுகாயங்களுடன் மீட்கப்பட்டு மருத்துவமனையில் அனுமதிக்கப்பட்டுள்ளார்.
