கோவையில் மொத்தம் மூன்று இடங்களில் பாஜக சார்பில் பொங்கல் பண்டிகை கொண்டாடப்பட்டு வருகிறது. இதற்கு “நம்ம ஊர் பொங்கல்” என பெயரிடப்பட்டுள்ளது. இந்நிலையில் வெள்ளலூர் நெடுஞ்சாலை அருகே இன்று காலை பொங்கல் பண்டிகை கொண்டாட்டம் தொடங்கியது. இதற்கான ஏற்பாடுகளை கடந்த சில நாட்களாக பாஜக செய்து வந்தது.
வெள்ளலூரில் பொங்கல் விழாஇந்நிலையில் இன்றைய தினம் (ஜனவரி 8) வெகு விமர்சையாக பொங்கல் திருவிழா கொண்டாடப்பட்டது. இதற்கு பாஜக தெற்கு மாவட்ட தலைவர் வசந்தராஜன் தலைமை வகித்தார். சிறப்பு விருந்தினராக நடிகையும், பாஜக தேசிய செயற்குழு உறுப்பினருமான குஷ்பு சுந்தர் கலந்து கொண்டார். முன்னதாக குஷ்பு உடன் அப்பகுதியை சேர்ந்த மக்கள் ஒன்று கூடி பொங்கல் வைத்து வழிபட்டனர்.
பொங்கல் வைத்து கொண்டாட்டம்இதையடுத்து பொங்கலை ஒருவருக்கொருவர் பரிமாறிக் கொண்டனர். இதனைத் தொடர்ந்து வண்ண உடைகளுடன் வெள்ளி கும்மியாட்டம் ஆடி அசத்தினர். அடுத்ததாக ரேக்ளா பந்தயம் நடைபெற்றது. அப்போது ரேக்ளா வண்டியின் மீது ஏறி நின்று குஷ்பு கொடி அசைத்து தொடங்கி வைத்தார். சில மீட்டர் தூரம் ரேக்ளா வண்டியில் குஷ்பு பயணம் செய்தது குறிப்பிடத்தக்கது.
200 மீட்டர், 300 மீட்டர், 500 மீட்டர் என பல்வேறு பிரிவுகளின் கீழ் ரேக்ளா பந்தயம் நடைபெற்று வருகிறது. இதில் காளைகள் சீறிப் பாய்ந்து ஓடின. இந்த போட்டிகள் தனித்தனியே நடத்தப்பட்டு வெற்றியாளர்கள் தேர்வு செய்யப்பட்டு பரிசுகள் வழங்கப்பட உள்ளன. முதல் பரிசாக டிவி உள்ளிட்ட விலை உயர்ந்த பொருட்கள் வழங்கப்படும் எனத் தகவல்கள் தெரிவிக்கின்றன.
பொங்கல் பரிசு – குஷ்பு விமர்சனம்பின்னர் செய்தியாளர்களிடம் பேசிய குஷ்பு, தமிழ்நாடு என்பதை தமிழகம், தமிழ்நாடு என்றும் அழைக்கலாம். அது தவறில்லை. எப்படி அழைத்தாலும் இந்தியாவின் அங்கம் தான். மும்பையில் பிறந்தாலும் நானும் தமிழச்சி தான். பொங்கல் நம்முடைய பாரம்பரிய பண்டிகை. வீட்டில் சந்தோஷம் கொடுக்கும் பண்டிகை. தமிழக அரசின் பொங்கல் பரிசு வெட்கக் கேடானது. ஒரு கரும்பு, ஆயிரம் ரூபாய் பிச்சை கொடுப்பது போல இருக்கிறது என்றார்.
வாரிசு? இல்ல துணிவு?அண்ணாமலை களத்தில் போராடினார். இவர் ஒரு துணிச்சலான தலைவர். இதற்கு முந்தைய தலைவர்கள் போல இல்லை. கமல்ஹாசன் காங்கிரஸ் கட்சி நடைபயணத்தில் பங்கேற்றது அவரது கட்சியின் தனிப்பட்ட உரிமை. வரும் பொங்கல் பண்டிகைக்கு துணிவு, வாரிசு ஆகிய படங்கள் திரைக்கு வருகின்றன. ஆனால் நான் எந்தப் படத்திற்கும் போகவில்லை. வீட்டில் தான் இருப்பேன் என்று குஷ்பு தெரிவித்தார்.