தமிழக சட்டப்பேரவை கூட்டத்தில் இன்று நடைபெற்ற விஷயம் பெரும் கொந்தளிப்பை ஏற்படுத்தி விவாதப் பொருளாக மாற்றியுள்ளது. மாநில அரசு தயாரித்து அளித்த உரையில் பல்வேறு வார்த்தைகளை, வரிகளை தவிர்த்து புதிய சில வார்த்தைகளை ஆளுநர் ஆர்.என்.ரவி பயன்படுத்தியுள்ளார். கடைசியில் தேசிய கீதம் ஒலிப்பதற்குள் அவசரமாய் வெளிநடப்பு செய்துவிட்டார். இது மரபு மீறல், அவையில் அநாகரிகமான ஒன்று, அரசியலைப்பு சட்டத்திற்கு எதிரான செயல் என்றெல்லாம் மாறி மாறி குற்றச்சாட்டுகள் முன்வைக்கப்பட்டு வருகின்றன.
மிகவும் வருத்தத்திற்கு உரியது
இதுதொடர்பாக பேசிய அமைச்சர் தங்கம் தென்னரசு, தமிழக சட்டப்பேரவையில் ஆளுநர் இன்று நடந்து கொண்டிருப்பது அரசியல் சட்டத்திற்கு எதிரானது. இது மிகவும் வருத்தம் அளிக்கிறது. இதனால் தான் முதல்வர் தீர்மானம் ஒன்றை கொண்டு வர நேர்ந்தது. ஆளுநர் வாசிக்க வேண்டிய வரைவு அறிக்கை ஏற்கனவே அவருக்கு அனுப்பி ஒப்புதல் பெறப்பட்டுள்ளது.
7ஆம் தேதி ஆளுநர் ஒப்புதல்
குறிப்பாக 5ஆம் தேதி முதல்வரின் ஒப்புதலுடன் ஆளுநருக்கு அனுப்பப்பட்டு விட்டது. இதை 7ஆம் தேதி ஆளுநர் ஏற்றுக் கொண்டிருக்கிறார். இதற்கான ஆதாரம் என்னிடம் இருக்கிறது. ஆளுநர் உரை என்பது அரசின் கொள்கைகளை எடுத்து சொல்லக்கூடிய உரை. ஒப்புதல் அளித்த உரையை விட்டு விட்டு இன்று அவர் படித்திருக்கும் உரையை முற்றிலும் ஏற்றுக் கொள்ள இயலாதது.
ஆளுநர் தவிர்த்த விஷயங்கள்
சமூகம், பொருளாதாரம் உள்ளிட்ட அனைத்து குறியீடுகளிலும் தமிழகம் முன்மாதிரி மாநிலமாக இருப்பது அனைவரும் அறிந்த விஷயம். தமிழகத்தை இந்த அளவிற்கு உருவாக்கி தந்த அண்ணா, பெரியார், காமராஜர், கலைஞர் ஆகியோரின் பெயர்களை தவிர்த்திருக்கிறார். நமது அரசியலைப்பை உருவாக்கி தந்த அம்பேத்கரின் பெயரை தவிர்த்திருப்பது மிகவும் வேதனையை அளிக்கிறது.
குடியரசு தலைவர் அப்படி செய்வாரா?
சமூக நீதி, சமத்துவம், பெண்ணடிமை ஒழிப்பு, மத நல்லிணக்கம், உள்ளடக்கிய வளர்ச்சி உள்ளிட்ட வார்த்தைகளை எல்லாம் ஆளுநர் தவிர்த்திருக்கிறார். மத்திய அரசு இயற்றி தரும் உரையை குடியரசு தலைவர் எந்தவித மாற்றமும் செய்யாமல் அப்படியே தான் படிப்பார். இன்னும் சொல்லப் போனால் தேசிய கீதத்திற்கு கூட மரியாதை அளிக்காமல் வெளியேறியிருப்பது இந்த நாட்டிற்கே இழைத்திருக்கும் இழுக்கு எனக் கருதுகிறோம். ஆளுநர் சனாதன கொள்கைகளை வெளியில் பேசலாம்.
தேசிய கீதத்திற்கு அவமதிப்பு
ஆனால் அவைக்கு வரும் போது சொந்த விருப்பு வெறுப்புகளை ஒதுக்கி வைத்து விட்டு செயல்பட வேண்டும். தமிழ்நாடு என்பதை மாற்றி ஆளுநர் பேசியதை கண்டிக்காமல் அதிமுக வெளியேறியிருப்பது அவர்கள் திராணியற்று இருப்பதை காட்டுகிறது. அவர்களும் தேசிய கீதம் இசைக்கப்படுவதற்கு முன்பாக வெளியேறியது அநாகரிகத்தின் உச்சகட்டம். ஆளுநரின் செயல் குறித்து சட்டரீதியான நடவடிக்கை எடுக்க பரிசீலனை செய்யப்படும் என்று தங்கம் தென்னரசு தெரிவித்துள்ளார்.