தமிழ்நாடு சட்டப்பேரவையில் இந்த ஆண்டின் முதல் கூட்டம் நேற்று கவர்னர் உரையுடன் தொடங்கியது. ஆனால் தமிழ்நாடு அரசு தயாரித்து கொடுத்த உரையின் ஒரு சில பகுதிகளை மட்டும் ஆளுநர் ஆர்.என்.ரவி படிக்காமல் தவிர்த்து விட்டார்.
இதனால் ஆளுநருக்கு எதிராக முதல்வர் மு.க.ஸ்டாலின் தீர்மானம் ஒன்றை கொண்டு வந்தார். இந்த தீர்மானத்தை தமிழக முதல்வர் மு.க.ஸ்டாலின் வாசித்து கொண்டு இருந்தபோதே ஆளுநர் ஆர்.என்.ரவி கோபத்தில் சட்டப்பேரவையை விட்டு வெளியேறினார்.
இந்த சம்பவம் காரணமாக சட்டசபையில் பெரும் பரபரப்பு ஏற்பட்டுள்ளது. அத்துடன் இல்லாமல், தமிழக அரசியலிலும் இந்த விவகாரம் பூதாகரமாக வெடித்துள்ளதால் அடுத்தடுத்து என்ன நடக்குமோ? என்ற எதிர்பார்ப்பு அதிகரித்துள்ளது.
இந்த பரபரப்பான சூழலில் வருகிற 12ம் தேதி ராஜ்பவனில் பொங்கல் விழா கொண்டாட தமிழ்நாடு ஆளுநர் ஆர்.என்.ரவி அழைப்பு விடுத்துள்ளார். இந்த அழைப்பிதழில் ‘தமிழ்நாடு’ என்ற வார்த்தை தவிர்க்கப்பட்டு ‘தமிழக ஆளுநர்’ என, குறிப்பிடப்பட்டு உள்ளது.
அதே சமயம் தமிழக ஆளுநர் மாளிகையில் நடத்தப்படும் பொங்கல் விழாவில் கலந்துகொள்ள ஆளும்கட்சி, எதிர்கட்சிகள், பிரபலங்கள் உள்ளிட்டோருக்கு அழைப்பிதழ் அனுப்பப்பட்டு உள்ளது.
சென்னை ஆளுநர் மாளிகையில் ஜனவரி 12ம் தேதி வியாழக்கிழமை மாலை 5.30 மணிக்கு நடக்க இருக்கும் பொங்கல் விழாவில் கலந்து கொண்டு சிறப்பிக்குமாறு இந்த அழைப்பிதழ் அனுப்பப்பட்டு உள்ளது.
கடந்த ஆண்டு ஏப்ரல் 14ம் தேதி, சென்னை ஆளுநர் மாளிகையில் மாலை 5 மணியளவில் ஒரு தேநீர் விருந்துக்காக அழைப்பு விடுக்கப்பட்டு இருந்தது. அதில் ‘தமிழ்நாடு ஆளுநர்’ என, குறிப்பிட்டு ஆர்.என்.ரவி அழைப்பு விடுத்து இருந்தார்.
இந்நிலையில் நேற்று நடந்த சட்டப் பேரவை நிகழ்ச்சியில் தமிழ்நாடு அரசு, திராவிட மாடல், மற்றும் அரசின் பாராட்டுக்கள் போன்ற அனைத்ததும் ஆளுநர் ஆர்.என்.ரவி ஒப்புதலுடனே அச்சிடப்பட்டாலும் அதை அவர் வாசிக்காமல் விட்டுவிட்டு வேறு சிலவற்றை கூறியது பெரும் சர்ச்சையை கிளப்பி உள்ளது.
இதைத் தொடர்ந்து தான் தமிழக முதல்வர் மு.க.ஸ்டாலின் தலைமையில் ஒரு தீர்மானம் கொண்டு வந்தார். அதில், ஆளுநர் உரையில் தமிழ் மற்றும் ஆங்கிலத்தில் என்ன அச்சிடப்பட்டு இருக்கிறதோ அவை தான் ‘அவை குறிப்பில் இருக்க வேண்டும்’ என கூறப்பட்டுள்ளதாக கூறப்படுகிறது.
ஏற்கனவே இதுதொடர்பாக ஆளுநர் ஆர்.என்.ரவி தரப்பில் இருந்து அதிகாரப்பூர்வமாக எவ்விதமான விளக்கமும் கொடுக்கப்படாத நிலையில் அடுத்த கட்ட சர்ச்சையாக பொங்கல் பண்டிகைக்கு அனுப்பி இருக்கக் கூடிய அழைப்பிதழில் ‘தமிழ்நாடு’ என்பதை பயன்படுத்ததாலும், தமிழ்நாடு அரசின் இலட்சினையை பயன்படுத்தாமலும் இருப்பதன் மூலம் ஆளுநர் ஆர்.என்.ரவி மீண்டும் ஒரு மோதல் போக்கை தொடங்கி இருக்கிறார் என்றே பரவலாக பேசப்படுகிறது.