டெல்லியில் நடைபெற்ற ஆர்எஸ்எஸ் கூட்டத்தில் அதன் தலைவர் மோகன் பாகவத் பங்கேற்று உரையாற்றினார். அப்போது அவர் கூறும்போது, “எளிய உண்மை இதுதான், ஹிந்துஸ்தான் ஹிந்துஸ்தானமாக இருக்க வேண்டும். இன்று பாரதத்தில் வாழும் முஸ்லிம்களுக்கு எந்த பாதிப்பும் இல்லை. இஸ்லாம் பயப்பட ஒன்றுமில்லை. ஆனால் அதே நேரத்தில், முஸ்லீம்கள் மேலாதிக்கம் என்ற ஆவேசப் பேச்சுக்களை கைவிட வேண்டும்.
‘நாங்கள் உயர்ந்த இனம். ஒரு முறை இந்த மண்ணை ஆண்டோம், மீண்டும் ஆள்வோம். எங்களுடைய பாதை மட்டுமே சரியானது. நாங்கள் வேறுபட்டவர்கள், ஒன்றாக வாழ முடியாது’ என்ற கதைகளையும் முஸ்லிம்கள் நிறுத்திக்கொள்ள வேண்டும். இங்கு வாழும் அனைவருமே, அது இந்துவாக இருந்தாலும் சரி, கம்யூனிஸ்ட்டாக இருந்தாலும் சரி, இத்தகைய தர்க்கத்தைக் கைவிட வேண்டும்.
1,000 ஆண்டுகளுக்கும் மேலாக போரில் ஈடுபட்டு வரும் சமூகத்தில் ஏற்பட்ட விழிப்புணர்வின் காரணமாக, உலகெங்கிலும் உள்ள இந்துக்கள் மத்தியில் புதிதாக கண்டறியப்பட்ட ஆக்ரோஷம் உள்ளது. இந்த நேரத்தில் இந்துக்களும் ஒரு விஷயத்தை புரிந்துகொள்ள வேண்டும்.
இந்து என்பதே நமது அடையாளம்; நமது தேசம்; நமது நாகரீக பண்பு. அனைவரையும் ஒன்றாக பார்க்க வேண்டும் என்றுதான் நமது நாகரீகம் நமக்கு கற்றுக்கொடுத்து இருக்கிறது. “நாங்கள்தான் சரி; மற்றவர்கள் எல்லாம் தவறு” என நாம் சொல்பவர்கள் கிடையாது. மாறாக, “எங்கள் இடத்தில் நாங்கள் சரி. உங்கள் இடத்தில் நீங்கள் சரி என அனுசரித்து செல்பவர்கள் நாம். இதுதான் இந்துத்துவா’’ என மோகன் பாகவத் கூறினார்.
மோகன் பகவத்தின் இந்தப் பேச்சுக்கு எதிர்வினையாற்றிய அகில இந்திய மஜ்லிஸ் கட்சித் தலைவரும், ஹைதராபாத் எம்.பி.யுமான அசாதுதீன் ஒவைசி, “இந்தியாவில் முஸ்லிம்களை வாழ அனுமதிப்பதற்கும், அவர்களின் நம்பிக்கையைப் பின்பற்றுமாறு கூறுவதற்கும் மோகன் பகவத் யார்? முஸ்லிம்கள் இந்தியராக இருப்பதற்கு நிபந்தனை போடும் அளவுக்கு மோகன் பாகவத்துக்கு துணிச்சல் வந்துவிட்டதா. நாங்கள் (முஸ்லிம்கள்) இந்தியர்கள். அல்லாவின் விருப்பத்தின் பேரில் நாங்கள் இந்தியர்களாக இருக்கிறோம்.
நாங்கள் எங்கள் நம்பிக்கையை விட்டுக்கொடுத்து இங்கு வாழ வரவில்லை. எங்கள் மார்க்கத்தை பின்பற்ற நாக்பூரில் இருக்கும் சில சன்னியாசிகளின் அனுமதியை பெற வேண்டிய அவசியமும் எங்களுக்கு இல்லை. வசுதெய்வக் குடும்பம் (உலக மக்கள் எல்லோரும் ஒரே குடும்பம்) என்ற வார்த்தையை கூட உச்சரிக்க உங்களுக்கு தகுதியில்லை. சொந்த நாட்டு மக்களை ஜாதியாலும், மதத்தாலும் பிரிக்கும் நீங்கள், வசுதெய்வக் குடும்பம் என்றெல்லாம் பேசாதீர்கள்” என விமர்சித்திருக்கிறார் என்பது குறிப்பிடத்தக்கது.
இந்தநிலையில் காங்கிரஸ் ராஜ்யசபா எம்பி கபில்சிபலும் மோகன்பகவத்தின் பேச்சை விமர்சித்துள்ளார். இது குறித்து அவர் தனது டிவிட்டர் பதிவில் கூறும்போது, ‘‘ஹிந்துஸ்தான் ஹிந்துஸ்தானமாக இருக்க வேண்டும் என்பதை ஏற்றுக் கொள்கிறேன். அதேபோல் மனிதர்களும் மனிதர்களாக மதிக்கப்பட வேண்டும்’’ என அவர் தெரிவித்துள்ளார்.