சென்னை உயர் நீதிமன்ற நீதிபதி பி.என்.பிரகாஷ் இன்றுடன் பணி ஓய்வு பெறுகிறார். இதனையடுத்து அவருக்கு இன்று பிரிவு உபசார நிகழ்ச்சிக்கு ஏற்பாடு செய்யப்பட்டிருந்தது.
இந்த நிகழ்ச்சியில் பேசிய தமிழ்நாடு அரசின் தலைமை வழக்கறிஞர் சண்முகசுந்தரம், ‘கடந்த ஒன்பதரை ஆண்டு காலத்தில் 69 ஆயிரம் வழக்குகளை முடித்து வைத்திருக்கும் நீதிபதி பிரகாஷ் இன்று பணி ஓய்வு பெறுவதால் குற்றவியல் தொடர்பான வழக்குகள் விசாரணையில் நிபுணத்துவம் பெற்ற நீதிபதியை இழக்கிறோம்’ என்று அவர் குறிப்பிட்டார்.
பின்னர் ஏற்புரையாற்றிய நீதிபதி பிரகாஷ், துப்பாக்கியுடன் செல்லும் உக்ரைனில் அல்லாமல், அதிபருடன் மோதிக்கொள்ள வேண்டிய பாகிஸ்தானில் அல்லாமல், மக்களால் பாதுகாக்கப்படும் சிறந்த அரசியலமைப்பு சட்டத்தை கொண்டிருக்கும் இந்தியாவில் நீதிபதியாக பணியாற்றியது குறித்து பெருமிதம் தெரிவித்தார்.
சக நீதிபதிகளும், வழக்கறிஞர்களும், பதிவுத்துறை பணியாளர்களும் சிறந்த ஒத்துழைப்பை வழங்கியதாக குறிப்பிட்ட நீதிபதி, 2009 ஆம் ஆண்டு பிப்ரவரி 19ம் தேதி நீதிமன்ற வளாகத்தில் நடந்த மோதல் சம்பவம் மோசமானது எனவும் குறிப்பிட்டார்.
எதேச்சையாக நீதிபதியாகிவிட்டதாகவும், ஓய்வுக்குபின், சிறை கைதிகளுக்கு புத்தாக்க பயிற்சி அளிப்பது, ஏழை மாணவர்கள் தேர்வு தடைகளை தகர்த்தெறிய பயிற்றுவிப்பது என முடிவு செய்துள்ளதாகவும் கூறிய நீதிபதி பிரகாஷ், ஏதேனும் தவறிழைத்திருந்தால் அதற்காக வருந்துவதாகவும், அதற்காக தனக்கு எதிராக பகைமை பாராட்ட வேண்டாம் எனவும் கேட்டுக் கொண்டார்.
2013 ஆம் ஆண்டு நியமிக்கப்பட்ட நீதிபதி பிரகாஷ் பணி ஓய்வு பெறுவதன் மூலம் சென்னை உயர் நீதிமன்றத்துக்கு அனுமதிக்கப்பட்ட 75 நீதிபதிகள் பதவிகளில், 52 ஆக குறைகிறது. 23 நீதிபதி பணியிடங்கள் காலியாக உள்ளன.