தமிழ்நாடு சட்டப்பேரவை கூட்டத்தொடரின் மூன்றாம் நாளான இன்று
எடப்பாடி பழனிசாமி
தலைமையிலான அதிமுக எம்.எல்.ஏக்கள் கருப்பு சட்டை அணிந்து வருகை புரிந்திருந்தனர். ஒருவேளை ஆளுநர் உரை நிகழ்த்திய போது முதல்வர்
மு.க.ஸ்டாலின்
தீர்மானம் கொண்டு வந்ததை எதிர்த்து இப்படி ஒரு நடவடிக்கையை எடுத்தார்களா? இல்லை தமிழ்நாட்டில் சட்டம், ஒழுங்கு பிரச்சினையை முன்வைத்து அப்படி செய்தார்களா?
எடப்பாடி டீம் அதிருப்தி
வேறு ஏதேனும் காரணங்களா எனக் கேள்வி எழுந்தது. இதுபற்றி கோட்டை வட்டாரத்தில் விசாரிக்கையில், எதிர்க்கட்சி துணைத் தலைவர் இருக்கை மாற்ற விவகாரம்,
ஓ.பன்னீர்செல்வம்
மற்றும் அவரது ஆதரவு எம்.எல்.ஏக்களுக்கு இடமாற்றம் ஆகியவை தொடர்பாக சபாநாயகர் அப்பாவு எந்தவொரு முடிவும் எடுக்கவில்லை. இதற்கு தங்களின் எதிர்ப்பை பதிவு செய்யும் வகையில் கருப்பு சட்டை அணிந்து வந்ததாக சொல்லப்படுகிறது.
கருப்பு சட்டை பின்னணி
முன்னதாக அதிமுகவில் ஒற்றை தலைமைக்கான அதிகாரப் போட்டியில் ஓ.பன்னீர்செல்வத்தை கட்சியில் இருந்து நீக்கி எடப்பாடி பழனிசாமி நடவடிக்கை எடுத்தார். இதையடுத்து தன்னை இடைக்கால பொதுச் செயலாளர் ஆகவும், எதிர்க்கட்சி துணைத் தலைவராக ஆர்.பி.உதயகுமாரை நியமித்தும் அடுத்தடுத்து அதிரடியான முடிவுகள் எடுக்கப்பட்டன. ஆனால் உச்ச நீதிமன்றத்தில் மாறி மாறி வழக்குகள் தொடரப்பட்ட விவகாரம் நிலுவையில் இருந்து வருகிறது.
குழப்பும் தேர்தல் ஆணையம்
லேட்டஸ்டாக அதிமுகவில் ஒருங்கிணைப்பாளர், இணை ஒருங்கிணைப்பாளர் பதவிகள் இன்னும் தொடர்வதாக தமிழக தேர்தல் ஆணையம் சுட்டிக் காட்டி கடிதம் அனுப்பியிருந்தது. ஆனால் அதை எடப்பாடி தரப்பு ஏற்க மறுத்துவிட்டது. இதற்கிடையில் முதல் நாள் கூட்டத்தில் ஆளுநர் தனது உரையில் இடம்பெற்றிருந்த விஷயங்களை தவிர்த்து, திருத்தி, புதிதாக சேர்த்து அதகளம் செய்துவிட்டார்.
முதல் நாள் சர்ச்சைகள்
இது இந்திய அரசியலமைப்பு சட்டத்தை மீறிய செயல், அவமரியாதை என்றெல்லாம் குற்றச்சாட்டுகள் முன்வைக்கப்பட்டன. ஆளுநர் உரை நிகழ்த்தப்பட்ட அடுத்த சில வினாடிகளில் தீர்மானம் கொண்டு வந்து அவையை ஆட்டம் காண வைத்தார் முதல்வர் மு.க.ஸ்டாலின். இதனால் கோபமடைந்து தேசிய கீதம் ஒலிக்கப்படும் வரை கூட காத்திருக்காமல் பாதியிலேயே வெளியேறி ஆளுநர் ஆர்.என்.ரவி சர்ச்சைக்கு ஆளானார்.
சட்டப்பேரவையில் இன்று
இதையடுத்து ஆளுநருக்கு எதிரான ஆர்ப்பாட்டங்கள் தொடர்ச்சியாக நடைபெற்று வருகின்றன. சட்டப்பேரவையில் இன்றைய தினம் பொதுக் கணக்கு குழுவின் அறிக்கைகள் தாக்கல் செய்யப்படவுள்ளன. இதையடுத்து பொது நிறுவனங்கள் குழுவின் அறிக்கைகள், சட்ட விதிகள் ஆய்வுக் குழுவின் அறிக்கைகள் அளித்தல்,
அரசு உறுதிமொழி குழுவின் அறிக்கைகள் அளித்தல், மனுக்கள் குழுவின் அறிக்கைகள் அளித்தல் ஆகிய நிகழ்வுகள் அரங்கேறும் எனத் தெரிவிக்கப்பட்டுள்ளது. இதற்கிடையில் ஆளுநர் உரைக்கு நன்றி தெரிவிக்கும் தீர்மானத்தை முன்மொழிந்து திமுக எம்.எல்.ஏ கம்பம் ராமகிருஷ்ணன் பேசுவார் என அவைக் குறிப்பில் கூறப்பட்டிருக்கிறது.