நடிகர் அஜித்குமார் நடிப்பில் போனி கபூர் தயாரிக்க எச்.வினோத் இயக்கியுள்ள திரைப்படம் தான் துணிவு. இந்த திரைப்படம் இன்று உலகம் முழுவதும் திரையரங்களில் வெளியாகியுள்ளது. அதேபோல் வம்சி இயக்கத்தில் விஜய் நடிப்பில் உருவாகியுள்ள திரைப்படம் வாரிசு.
இதுவும் ஜனவரி 11ம் தேதியான இன்றே வெளியாகியுள்ளது. இந்த நிலையில் 8 ஆண்டுகளுக்குப் பிறகு அஜித் – விஜய் 2 திரைப்படங்களும் (ஜனவரி 11ம் தேதி) ஒரே நாளில் வெளியாகியுள்ளது ரசிகர்களிடையே உற்சாகத்தை ஏற்படுத்தியுள்ளது.
வாரிசு மற்றும் துணிவு திரைப்படங்களுக்கு பொங்கல் சிறப்புக் காட்சிகளுக்கு அனுமதி இல்லை பல்வேறு தகவல்கள் சமூக வலைதலங்களில் பரவி வருகின்றது.
இந்த நிலையில், தற்போது தமிழக அரசின் சார்பில் வெளியிடப்பட்ட அறிவிப்பில், “பொங்கலை முன்னிட்டு வெளியாகவுள்ள திரைப்படங்களுக்கு சிறப்பு காட்சிகளுக்கு அனுமதி வழங்கப்படுகிறது. திரைப்பட விநியோகஸ்தர்களின் கோரிக்கை ஏற்றுக்கொள்ளப்பட்டதால் வாரிசு மற்றும் துணிவு படங்களுக்கு ஜனவரி 12, 13 மற்றும் 18 ஆகிய தேதிகளில் கூடுதல் காட்சிகளை திரையிட அனுமதி வழங்கப்படுகிறது.” என்று தெரிவிக்கப்பட்டுள்ளது.