தமிழர்களின் திருநாளாம் பொங்கல் பண்டிகை ஆண்டுதோறும் ஆளுநர் மாளிகையில் கொண்டாடப்படுவது வழக்கம். இந்த வழக்கத்தின்படி இந்த ஆண்டும் ராஜ்பவனில் இன்று மாலை பொங்கல் பண்டிகை கொண்டாடப்பட்டது.
தமிழக முதல்வர், அமைச்சர்கள், ஆளுங்கட்சி, எதிர்க்கட்சி எம்எல்ஏக்கள், எம்பிக்கள், ஐஏஎஸ், ஐபிஎஸ் அதிகாரிகள், நீதிபதிகள், ஆதினங்கள், மதகுருமார்கள், பிஷப்கள், விவசாயிகள், சிறப்பாசிரியர்கள், பழங்குடியின மாணவர்கள் என சுமார் 2,000 பேருக்கு பொங்கல் பண்டிகை விழாவில் பங்கேற்க ஆளுநர் அழைப்பு விடுத்திருந்தார்.
இந்த நிலையில், இன்று மாலை 5:30 மணிக்கு ராஜ் பவனில் தொடங்கிய பொங்கல் விழாவுக்கு சட்டமன்ற எதிர்க்கட்சி தலைவர் எடப்பாடி பழனிசாமி, முன்னாள் முதல்வர் ஓ.பன்னீர்செல்வம், அதிமுக முன்னாள் அமைச்சர்கள், பாஜக எம்எல்ஏ வானதி சீனிவாசன் உள்ளிட்டோர் வருகை தந்திருந்தனர்.
ஆளுநர் மாளிகையில் நடைபெறும் பொங்கல் திருநாள் வைபவத்தில் பங்கேற்க வந்தவர்களை வெண்ணிற வேட்டி, சட்டை, தலைப்பாகை சகிதம் பாராம்பரிய உடையில் தோன்றிய ஆளுநர் ரவி இருகரம் கூப்பி வரவேற்றார்.
ஆனால் இந்த விழாவில் முதல்வர் ஸ்டாலின், திமுக அமைச்சர்கள், எம்பிக்கள் மற்றும் எம்எல்ஏக்கள் என ஆளுங்கட்சி தரப்பில் யாரும் பங்கேற்கவில்லை. சட்டமன்றத்தில் சில தினங்களுக்கு ஆளுநர் உரையின்போது நடைபெற்ற விரும்பதகாத நிகழ்வுகள், பொங்கல் விழா அழைப்பிதழில் தமிழ்நாடு அரசின் இலச்சினைக்கு (LOGO) பதிலாக, மத்திய அரசின் இலச்சினையை அச்சிட்டது, அழைப்பிதழில் தமிழ்நாடு ஆளுநர் என்பதற்கு பதிலாக தமிழக ஆளுநர் என்று குறிப்பிடப்பட்டிருந்தது போன்ற காரணங்களால் முதல்வர் ஸ்டாலின் உள்ளிட்ட ஆளும் திமுக தரப்பில் இருந்து யாரும் ஆளுநர் மாளிகையில் நடைபெற்ற பொங்கல் விழாவில் பங்கேற்கவில்லை என்று கோட்டை வட்டாரங்கள் தெரிவிக்கின்றன.
ஆனால், கடந்த ஜனவரி 9 ஆம் தேதி தமிழ்நாடு சட்டப்பேரவையில் ஆளுநர் ரவி நிகழ்த்திய உரையில், பெரியார், அண்ணா ஆகிய தலைவர்களின் பெயர்களையும் தவிர்த்து பேசினார். அண்ணாவை தங்களது கட்சியின் பெயரில் வைத்திருக்கும் அதிமுகவை சேர்ந்த இபிஎஸ், ஓபிஎஸ் உள்ளிட்ட யாரும் இதுகுறித்து கேள்வியோ, கண்டனமோ எழுப்பவில்லை. மாறாக அவர்கள் இருவரும் இன்று வெகு இயல்பாக ஆளுநர் தமது மாளிகையில் அளித்த பொங்கல் விருந்தில் பங்கேற்றனர் என்பது குறிப்பிடத்தக்கது.
தமிழ்நாட்டின் ஆளுநராக ரவி பொறுப்பேற்றதில் இகுந்தே அவருக்கும், ஆளும் திமுக அரசுக்கும் இடையேயான மோதல் போக்கு நீடித்து வருகிறது. கடந்த ஓராண்டுக்கு மேலாக நீறுபூத்த நெருப்பாய் இருந்து வந்த ஆளுநர், மாநில அரசுக்கு இடையேயான மோதல் நடப்பு சட்டமன்ற கூட்டத்தொடரில் சபையில் வெளிப்படையாக வெடித்தது. இதன் எதிரொலியாக ஆளுநர் ரவி அழைப்பு விடுத்திருந்த பொங்கல் விழாவை ஆளும் திமுக ஒட்டுமொத்தமாக புறக்கணித்துள்ளது. இதேபோன்று கடந்த ஆண்டு ஏப்ரல் மாதம் தமிழ் புததாண்டை முன்னிட்டு ஆளுநர் மாளிகையில் அளிக்கப்பட்ட தேநீர் விருந்தை முதல்வர் ஸ்டாலின் தலைமையிலான திமுக அரசு ஒட்டுமொத்தமாய் புறக்கணித்தது.