தமிழ்நாடு உயர்கல்வித்துறை அமைச்சர் பொன்முடியின் சகோதரர் மருத்துவர் தியாகராஜன் இன்று உடல் நலக்குறைவால் உயிரிழந்தார். அவருக்கு வயது 65.
சிறுநீரக சிறப்பு மருத்துவராக பணியாற்றி வந்த தியாகராஜன் கடந்த சில தினங்களாக உடல் நலக்குறைவால் சென்னையில் உள்ள தனியார் மருத்துவமனையில் அனுமதிக்கப்பட்டு சிகிச்சை பெற்று வந்துள்ளார். இந்நிலையில் சிகிச்சை பலனின்றி இன்று அதிகாலை மருத்துவர் தியாகராஜன் உயிரிழந்தார்.
அவரது உடல் தற்போது விழுப்புரத்தில் உள்ள இல்லத்தில் அஞ்சலிக்காக வைக்கப்பட்டுள்ளது. திமுகவைச் சேர்ந்த நிர்வாகிகள், தொண்டர்கள், பல்வேறு கட்சிகளைச் சேர்ந்தவர்கள் தியாகராஜன் உடலுக்கு அஞ்சலி செலுத்தி வருகின்றனர். இன்று மாலை 4.30 மணிக்கு இறுதி சடங்கு நடைபெறும் என்று தெரிவிக்கப்பட்டுள்ளது.
அதைத் தொடர்ந்து விழுப்புரம் – பாண்டி ரோடு காந்தி சிலை அருகே உள்ள மரகதம் மருத்துவமனையிலிருந்து இறுதி ஊர்வலம் தொடங்கி மருதூர் இடுகாட்டில் அடக்கம் செய்யப்படுகிறது.
அமைச்சரின் தம்பி தியாகராஜனின் மறைவைத் தொடர்ந்து முதலமைச்சர்
மு.க.ஸ்டாலின்
வெளியிட்டுள்ள இரங்கற் பதிவில், “உயர் கல்வித்துறை அமைச்சர் பொன்முடி அவர்களின் தம்பியான மருத்துவர் தியாகராஜன் (65) அவர்கள் மறைவெய்தினார் என்ற செய்தியால் மிகவும் வேதனையுற்றேன்.
உடன்பிறந்த தம்பியை இழந்து தவிக்கும் பொன்முடி அவர்களுக்கும் அவர்தம் குடும்பத்தினருக்கும் எனது ஆழ்ந்த இரங்கல்களையும் ஆறுதலையும் கூறிக்கொண்டு அவர்களது துயரில் பங்கெடுக்கிறேன்” என்று தெரிவித்துள்ளார்.