224 தொகுதிகள் கொண்ட கர்நாடக மாநில சட்டப்பேரவைக்கு வரும் மே மாதம் தேர்தல் நடைபெறும் என எதிர்பார்க்கப்படுகிறது. கடந்த 2018 சட்டப்பேரவை தேர்தலில் பாஜக 104 (36.35%),
காங்கிரஸ்
80 (38.14%), மதச்சார்பற்ற ஜனதா தளம் 37 (18.3%), மற்றவை 3 என வெற்றி பெற்றன. ஆட்சியை பிடிக்க 113 இடங்களை கைப்பற்ற வேண்டும். ஆனால் யாருக்கும் பெரும்பான்மை கிடைக்காத காரணமாக காங்கிரஸ் – மதச்சார்பற்ற கூட்டணி ஆட்சி அமைத்தது. ஆனால் 14 மாதங்களில் ஆட்சி கலைக்கப்பட்டு பாஜக ஆட்சியை பிடித்தது.
பாஜக வெற்றி
இதன் பின்னணியில் காங்கிரஸ் – மதச்சார்பற்ற கூட்டணி எம்.எல்.ஏக்கள் விலை போன சம்பவமும், இடைத்தேர்தலில் பாஜக சார்பில் போட்டியிட்ட நிகழ்வும் அரங்கேறின. அதன்பிறகு எடியூரப்பா, பசவராஜ் பொம்மை என இரண்டு பாஜக முதல்வர்கள் பதவி வகித்தனர். இந்த சூழலில் தான் 2023 சட்டப்பேரவை வரவுள்ளது. கடந்த தேர்தலை போல இல்லாமல் அறுதி பெரும்பான்மை பெற்று ஆட்சியை பிடிக்க பாஜக திட்டமிட்டுள்ளது.
இலக்கு நிர்ணயித்த டெல்லி
மொத்தமுள்ள 224 தொகுதிகளில் குறைந்தது 150 இடங்களில் வெற்றி பெற வேண்டும் என இலக்கு நிர்ணயித்துள்ளது. இம்முறை கூட்டணி கணக்குகள் மாறும் சூழல் ஏற்பட்டிருக்கிறது. மதச்சார்பற்ற ஜனதா தளம் உடன் பாஜக கைகோர்க்குமா எனக் கேள்வி எழுந்த நிலையில், அதற்கு வாய்ப்பில்லை என அக்கட்சி தலைமை முற்றுப்புள்ளி வைத்துள்ளது. எனவே பாஜக தனித்து களமிறங்க அதிக வாய்ப்புள்ளதாக தெரிகிறது.
சிக்கலில் பொம்மை அரசு
முதல்வர் வேட்பாளரில் தான் சிக்கல் ஏற்பட்டுள்ளது. ஏனெனில் அரசு ஒப்பந்த பணிகளில் ஊழல், ஹிஜாப் விவகாரம், லவ் ஜிகாத், கொரோனா நெருக்கடியை சரியாக கையாளாதது, பெங்களூரு உள்கட்டமைப்பு வசதிகளில் தொடரும் பிரச்சினைகள் என பாஜக ஆட்சியில் பல்வேறு சர்ச்சைகள் வெடித்தன. இது முதல்வர் பசவராஜ் பொம்மைக்கு பின்னடைவாக பார்க்கப்படுகிறது.
எடியூரப்பா வருவாரா?
மறுபுறம் காங்கிரஸ் கட்சியில் டிகே சிவக்குமார் முன்னிறுத்தப்பட வாய்ப்புள்ளது. அவரை எதிர்கொள்ள பொம்மை சரியான நபராக இருப்பாரா? என்பது கேள்விக்குறி தான் என்கின்றனர். இதனால் மீண்டும் எடியூரப்பாவிற்கு முன்னுரிமை அளிக்கப்படுமா? எனக் கேள்வி முன்வைக்கப்படுகிறது. ஆனால் அவரது மகனுக்கு தான் வாய்ப்புகள் இருப்பதாகவும், எடியூரப்பாவிற்கு கட்சி ரீதியாக சில பொறுப்புகள் கொடுக்க இருப்பதாகவும் தகவல்கள் தெரிவிக்கின்றன.
சீட் கிடையாது
இத்தகைய சூழலில் குஜராத் தேர்தல் வியூகத்தை கையிலெடுக்க பாஜக தலைமை திட்டமிட்டிருப்பதாக சொல்லப்படுகிறது. அதாவது, சரியாக செயல்படாத முதல்வர்கள், அமைச்சர்கள், எம்.எல்.ஏக்கள் என யாருக்கும் சீட் கிடையாது. இவர்களை கட்சி பணியாற்ற திருப்பி விட்டு விட்டு புதியவர்களை போட்டியிட வைப்பர். உள்ளூரில் செல்வாக்கு மிகுந்த நபர்களை சரியாக தேர்வு செய்து சீட் வழங்க கட்சி தலைமை திட்டமிட்டுள்ளது.
கருத்துக்கணிப்பு முடிவுகள்
இதற்கிடையில் மக்களை கவரும் வகையிலான தேர்தல் அறிக்கையை தயார் செய்து வருகின்றனர். தற்போதே சில கருத்துக்கணிப்பு முடிவுகள் வெளியாகி பாஜகவிற்கு ஷாக் கொடுத்துள்ளது. கடந்த முறையை விட குறைவான இடங்களே கிடைக்கும் என்றும், காங்கிரஸ், மதச்சார்ப்பற்ற ஜனதா தளம் ஆகிய கட்சிகள் அதிக இடங்களில் வெற்றி பெறும் எனவும் சொல்லப்படுகிறது. இருப்பினும் தேர்தலுக்கு இன்னும் நாட்கள் இருப்பதால் அவ்வளவு உறுதியாக சொல்ல முடியாது என அரசியல் பார்வையாளர்கள் கூறுகின்றனர்.