குத்துயிரும், குலையிருமாக இருக்கும் காங்கிரஸ் கட்சிக்கு புத்துயிர் கொடுக்கும் நோக்கிலும், மத்திய பாஜக அரசின் மக்கள் விரோத கொள்கைகளாக காங்கிரஸ் கருதுபவை குறித்து பொதுமக்களிடம் எடுத்துரைக்கும இலக்கிலும் அந்த கட்சியின் நாடாளுமன்ற உறுப்பினரும், சோனியா காந்தியின் மகனுமான ராகுல் காந்தி, பாரத் ஜோடோ என்ற பெயரில் இந்திய ஒற்றுமைப் பயணத்தை நடத்தி வருகிறார்.
இந்த ஒற்றுமை யாத்திரையை கடந்த 2022 ஆம் ஆண்டு செப்டம்பர் மாதம் 7 ஆம் தேதி தமிழகத்தின் கன்னியாகுமரி மாவட்டத்தில் தொடங்கப்பட்டது. இதை திமுக தலைவரும், தமிழ்நாடு முதலமைச்சருமான மு.க.ஸ்டாலின் தொடங்கி வைத்தார்.
ஆந்திரா, கேரளா, கர்நாடகா, தெலங்கானா, மகாராஷ்டிரா, மத்திய பிரதேசம், ராஜஸ்தான், பஞ்சாப் டெல்லி, ஹரியானா உள்ளிட்ட மாநிலங்களை கடந்து, தற்போது அவரது ஒற்றுமை யாத்திரை ஹிமாசலப் பிரதேசத்தை அடைந்துள்ளது.
அங்கு இன்று சிம்லாவில் ராகுல் காந்தி செய்தியாளர்களை சந்தித்தார். அப்போது அவர் தான் ஒற்றுமை யாத்திரையை துவங்குவதற்கான காரணம் குறித்து அவர் செய்தியாளர்களிடம் விளக்கினார். அப்போது அவர் கூறும்போது, ” நாங்கள் நாடாளுமன்றத்தில் சில விவகாரங்கள் குறித்து நாங்கள் நாடாளுமன்றத்தில் குரல் எழுப்ப முயன்றோம். ஆனால் எங்களது குரல்கள் நசுக்கப்பட்டன.
நீதித் துறை, ஊடகம் என எந்தவொரு அமைப்பின் வாயிலாகவும் எங்களது விவகாரங்களை எழுப்ப முடியவில்லை. இந்த அமைப்பகள் அனைத்தும் ஆர்எஸ்எஸ் மற்றும் பாஜகவால் ஒருவித நெருக்கடியில் இருப்பதாக தெரிகிறது. நாடாளுமன்றம், நீதித் துறை, ஊடகம் என எந்தவொரு ஜனநாயக அமைப்புகளின் மூலமும் எங்களது குரலை எழுப்ப முடியாத நிலையில், நாங்கள் கன்னியாகுமரியில் இருந்து ஜம்மு -காஷ்மீர் வரை இந்திய ஒற்றுமை யாத்திரையை தொடங்கினோம்” என்று ராகுல் காந்தி தெரிவித்துள்ளார்.
இந்திய ஒற்றுமை யாத்திரையில் செல்லும் இடமெல்லாம் ராகுல் காந்திக்கு பொது மக்கள் உற்சாக வரவேற்பு அளித்து வருகின்றனர். மேலும், அவரது நடைபயணத்தில் பிரபலங்கள், முன்னாள் அரசு அதிகாரிகள், தொழிலதிபர்கள் உள்ளிட்டோரும் கலந்து கொண்டு ராகுல் காந்திக்கு ஊக்கம் அளித்து வருகின்றனர். பல தரப்பு மக்களை சந்திக்கும் ராகுல் காந்தி, அவர்களது குறைகளை கேட்டறிந்து வருகிறார். அவரது இந்த நடைபயணம் வரும் 30 ஆம் தேதி ஜம்மு காஷ்மீரின் ஸ்ரீநகரில் நிறைவு பெறுகிறது.
இந்திய ஒற்றுமை யாத்திரையினஅ நிறைவு விழாவில் கலந்து கொள்ளும்படி, 21 கட்சிகளுக்கு, அகில இந்திய காங்கிரஸ் தலைவர் மல்லிகார்ஜூன கார்கே அழைப்பு விடுத்துள்ளார்.
ஆந்திர மாநில முன்னாள் முதல்வர் சந்திரபாபு நாயுடுவின் தெலுங்கு தேசம், மேற்கு வங்க மாநில முதல்வர் மம்தா பானர்ஜியின் திரிணாமுல் காங்கிரஸ், பீகார் மாநில முதலமைச்சர் நிதிஷ் குமாரின் ஐக்கிய ஜனதா தளம், , பீகார் மாநில துணை முதலமைச்சர் தேஜஸ்வி யாதவின் ராஷ்ட்ரீய ஜனதா தளம், கம்யூனிஸ்ட் கட்சிகள், உத்தர பிரதேச மாநில முன்னாள் முதலமைச்சர் அகிலேஷ் யாதவின் சமாஜ்வாடி, முன்னாள் முதலமைச்சர் மாயாவதியின் பகுஜன் சமாஜ் உள்ளிட்ட கட்சிகளுக்கு அழைப்பிதழ் அனுப்பப்பட்டுள்ளது.