ஈரோடு கிழக்கு தொகுதியில் பிப்ரவரி 27ஆம் தேதி இடைத்தேர்தல் நடைபெற உள்ளது. தேர்தலுக்கான ஆயத்த பணிகள் தீவிரமாக நடைபெற்று வருகின்றன. அதன் ஒரு பகுதியாக இன்று, மாவட்ட தேர்தல் அதிகாரி கிருஷ்ணன் உன்னி மற்றும் இதர கட்சியினர் முன்னிலையில் ஈரோடு மாவட்ட மின்னணு வாக்குப்பதிவு இயந்திரக் கிடங்கில் வைக்கப்பட்டுள்ள மின்னணு வாக்குப்பதிவு இயந்திரங்களை இடைத்தேர்தலுக்கு தயார் செய்யும் பணியில் பெல் நிறுவன ஊழியர்கள் ஈடுபட்டுள்ளனர்.
இதுகுறித்து செய்தியாளர்களுக்கு பேட்டியளித்த தேர்தல் அதிகாரி கிருஷ்ணன் உன்னி, “இடைத்தேர்தலுக்காக 500 மின்னணு வாக்குப்பதிவு இயந்திரங்களை தயார் செய்து வருவதாகவும், இதற்கான பணியில் 8 பெல் நிறுவன ஊழியர்கள் ஈடுபட்டுள்ளதாகவும், இன்றைக்குள் இந்த பணிகள் நிறைவடையும்” எனவும் அவர் தெரிவித்துள்ளார்.
ஈரோடு கிழக்கு சட்டமன்ற தொகுதி காங்கிரஸ் எம்எல்ஏ திருமகன் ஈவெரா கடந்த 4 ஆம் தேதி திடீரென காலமானார். இதையடுத்து அந்த தொகுதி காலியானதாக அறிவிக்கப்பட்டது. ஒரு தொகுதி காலியானதாக அறிவிக்கப்பட்ட தேதியில் இருந்து அடுத்த 6 மாதங்களுக்குள் அங்கு தேர்தல் நடத்தப்பட வேண்டும்.
இந்த விதியின்படி, ஈரோடு கிழக்கு தொகுதிக்கான இடைத்தேர்தல் தேதி எப்போது அறிவி்க்கப்படும் என்ற எதிர்பார்ப்பு தமிழக அரசியலில் எழுந்திருந்தது.
இந்த நிலையில், ஈரோடு கிழக்கு தொகுதிக்கான இடைத்தேர்தல் தேதியை இந்திய தலைமை தேர்தல் ஆணையம் தலைநகர் டெல்லியில் நேற்று அறிவித்திருந்தது.. அதன்படி, ஈரோடு கிழக்கு தொகுதிக்கான இடைத்தேர்தல் வரும் பிப்ரவரி மாதம் 27ஆம் தேதி நடத்தப்படும் என தலைமை தேர்தல் ஆணையர் ராஜீவ் குமார் அறிவித்துள்ளார். . மார்ச் 2ஆம் தேதி வாக்கு எண்ணிக்கை நடைபெற்று முடிவுகள் அறிவிக்கப்படும் எனவும் அறிவிக்கப்பட்டுள்ளது.