ஈரோடு கிழக்கு சட்டமன்ற தொகுதிக்கான இடைத்தேர்தல் வரும் பிப்ரவரி 27ஆம் தேதி நடக்கிறது. இதையடுத்து மார்ச் 2ஆம் தேதி வாக்குகள் எண்ணப்பட்டு முடிவுகள் அறிவிக்கப்பட உள்ளன. திமுக கூட்டணி சார்பில் காங்கிரஸ் வேட்பாளர் ஈவிகேஎஸ் இளங்கோவன் களமிறங்குகிறார். அதிமுக சார்பில்
எடப்பாடி பழனிசாமி
,
ஓ.பன்னீர்செல்வம்
என இரு தரப்பும் போட்டியிட முடிவு செய்துள்ளது. இந்நிலையில் ஈரோட்டில் முகாமிட்டுள்ள எடப்பாடி தரப்பு வேட்பாளர் யார்? என்பதை முடிவு செய்யும் பணிகள் தீவிரம் காட்டி வருகிறது.
தயாரான எடப்பாடி
நேற்று முதல் தொடர் ஆலோசனை நடத்தி வருகின்றனர். ஈரோடு கிழக்கு இடைத்தேர்தலுக்காக அறிவிக்கப்பட்ட 106 பேர் கொண்ட தேர்தல் பணிக்குழு உறுப்பினர்கள் அனைவரும் ஈரோட்டிற்கு உடனடியாக வர உத்தரவு பிறப்பிக்கப்பட்டுள்ளது. இந்நிலையில் இரட்டை இலை சின்னத்திற்காக உச்ச நீதிமன்றத்தை நாட எடப்பாடி பழனிசாமி முடிவு செய்தது.
உச்ச நீதிமன்றத்தில் முறையீடு
அதன்படி உச்ச நீதிமன்றம் நீதிபதி மகேஸ்வரி தினேஷ் தலைமையிலான அமர்வில் எடப்பாடி தரப்பில் மூத்த வழக்கறிஞர் அரிமா சுந்தரம் இன்று முறையீடு செய்துள்ளார். அதில், ஈரோடு கிழக்கு இடைத்தேர்தலில் எங்கள் சார்பில் வேட்பாளரை நிறுத்த உள்ளோம். இடைக்கால பொதுச் செயலாளர் என்ற முறையில் எனது கையெழுத்தை ஏற்க தேர்தல் ஆணையம் மறுக்கிறது.
தேர்தல் ஆணையத்தில் சிக்கல்
அதிமுக பொதுக்குழு வழக்கில் இருதரப்பு வாதங்களும் நிறைவு பெற்ற நிலையில், தேதி குறிப்பிடாமல் தீர்ப்பு ஒத்திவைக்கப்பட்டுள்ளது. அதற்குள் எதிர்பாராத விதமாக இடைத்தேர்தல் வந்துள்ளது. எனவே இடைக்கால பொதுச் செயலாளராக அதிமுக பொதுக்குழு தன்னை தேர்வு செய்ததை இந்திய தலைமை தேர்தல் ஆணையர் அங்கீகரிக்க உத்தரவிட வேண்டும் என்று கேட்டுக் கொள்ளப்பட்டது.
வரும் 30ஆம் தேதி
உடனே, ஓ.பன்னீர்செல்வம் தரப்பிற்கு உங்களது கோரிக்கையை தெரிவித்து விட்டீர்களா? என்று உச்ச நீதிமன்றம் கேள்வி எழுப்பியது. அதற்கு, தகவலை பகிர்ந்து கொண்டோம் என்று பழனிசாமி தரப்பு நீதிமன்றத்தில் தெரிவித்துள்ளது. இந்நிலையில் வரும் 30ஆம் தேதி முறையீடு செய்யுமாறு உச்ச நீதிமன்றம் அறிவுறுத்தியுள்ளது. மேலும் தீர்ப்பு வழங்குவது குறித்து நாங்கள் பரிசீலிக்கிறோம் எனவும் நீதிபதிகள் தெரிவித்துள்ளனர்.
கால அவகாசம் குறைவு
இந்த வழக்கில் உச்ச நீதிமன்றம் இடைக்கால உத்தரவு பிறப்பித்தாலும், அதிமுக எடப்பாடி தரப்பிற்கு வந்துவிட வாய்ப்புள்ளது. ஆனால் இருக்கும் கால அவகாசம் என்பது மிகக் குறைவு என்பதால் உச்ச நீதிமன்றம் எப்படி கையாளப் போகிறது என்பது மில்லியன் டாலர் கேள்வியாக மாறியுள்ளது. ஈரோடு கிழக்கு இடைத்தேர்தலுக்கு வேட்பு மனு தாக்கல் கடைசி தேதி பிப்ரவரி 7ஆம் தேதி ஆகும்.
தீர்ப்பு எப்போது?
இதையடுத்து வேட்புமனு பரிசீலனை, இறுதி வேட்பாளர் பட்டியல் என பிப்ரவரி 10ஆம் தேதிக்கு பின்னர் பிரச்சாரக் களம் சூடுபிடித்துவிடும். அதற்குள் உச்ச நீதிமன்றம் உரிய விசாரணை நடத்தி தீர்வை சொல்லுமா? என்பது தான் கேள்வி. ஏனெனில் அதிமுக பொதுக்குழு வழக்கு சுமார் 6 மாதங்களாக தீர்வு காணப்படாமல் தொடர்ந்து கொண்டிருப்பதை பார்க்க முடிகிறது.