அவிநாசி : அவிநாசி அருகே தண்டுக்காரன்பாளையத்தில் பேருந்து நிறுத்தத்தில் நின்றிருந்த பயணிகள் மீது கார் மோதியது. இதில் மூதாட்டி பரிதாபமாக உயிரிழந்தார். மேலும் 7 பேர் படுகாயமடைந்தனர்.திருப்பூர் மாவட்டம், அவிநாசி அருகே தண்டுகாரம்பாளையம் பேருந்து நிறுத்தம் பகுதியில் நேற்று முன்தினம் இரவு பயணிகள் வழக்கம்போல சாலையின் இருபுறமும் பேருந்துக்காக காத்திருந்தனர். இந்நிலையில், ஈரோடு மாவட்டம் பண்ணாரியில் இருந்து புளியம்பட்டி வழியாக திருப்பூருக்கு வேகமாக கார் ஒன்று வந்து கொண்டிருந்தது. திடீரென ஓட்டுனரின் கட்டுப்பாட்டை இழந்து கார் ஓடியது. பின்னர் பேருந்து நிறுத்தத்தில் நின்ற பயணிகள் மீது மோதி ஓடிய கார் அங்கிருந்த மின் கம்பத்தின் மீது நின்றது.
இதில் புளியம்பட்டி அருகே உள்ள புங்கம்பள்ளியை சேர்ந்த நாகராஜ் என்பவர் மனைவி பாப்பாத்தி (51) சம்பவ இடத்திலேயே பரிதாபமாக உயிரிழந்தார். மேலும் தண்டுக்காரன்பாளையம் ஆதி திராவிடர் காலனியை சேர்ந்த காளியம்மாள் (60), மஞ்சுளா (38), சின்னக்கானூர் பகுதியை சேர்ந்த ரங்கன் (52) ஆகிய 3 பேர் படுகாயம் அடைந்தனர் அவர்கள் திருமுருகன்பூண்டி தனியார் மருத்துவமனையில் சிகிச்சைக்காக அனுமதிக்கப்பட்டனர்.
காரில் வந்த திருப்பூரை சேர்ந்த கணேஷ் பிரதீப், அவரது மனைவி, இரு குழந்தைகளும் படுகாயம் அடைந்தனர். அவர்கள் சிகிச்சைக்காக திருப்பூர் அரசு மருத்துவமனையில் அனுமதிக்கப்பட்டனர். இது குறித்து சேவூர் போலீசார் வழக்குப்பதிந்து விசாரணை நடத்தி வருகின்றனர். இச்சம்பவம் அப்பகுதியில் பரபரப்பை ஏற்படுத்தியுள்ளது.