ஈரோடு கிழக்கு இடைத்தேர்தல் களம் விறுவிறுப்பாக சென்று கொண்டிருக்கும் நிலையில் தேர்தல் நடத்தும் அலுவலரும், மாநகராட்சி ஆணையருமான சிவகுமார் மற்றும் மாவட்ட ஆட்சியர் கிருஷ்ணன் உன்னியிடம் அளிக்கப்பட்ட புகார் பரபரப்பை ஏற்படுத்தியுள்ளது.
திமுக
அரசு அமைச்சர்கள், நாடாளுமன்ற உறுப்பினர்கள், உள்ளாட்சி பிரதிநிதிகள் கொட்டகை அமைத்து தேர்தல் நடத்தை விதிமுறைக்கு மாறாக செயல்பட்டு வருவதாக அதிமுக முன்னாள் அமைச்சர் செங்கோட்டையன் தலைமையில் புகார் அளிக்கப்பட்டுள்ளது.
எதிர்க்கட்சிகள் புகார்
அப்போது, முன்னாள் அமைச்சர்கள் செங்கோட்டையன், கருப்பண்ணன், உடுமலை ராதாகிருஷ்ணன், கே.வி.ராமலிங்கம், பாஜக சட்டமன்ற உறுப்பினர் சரஸ்வதி, தமிழ் மாநில காங்கிரஸ் கட்சி மாநில இளைஞர் அணி தலைவர் யுவராஜா உள்ளிட்டோர் உடனிருந்தனர். அதில், 120 இடங்களில் செட் கொட்டகை அமைத்து நாற்காலிகள் போட்டுள்ளனர்.
தேர்தல் விதிமுறைகள் மீறல்
முறைகேடாக உரிய அனுமதியின்றி அமைக்கப்பட்டுள்ள செட்களுக்கான செலவுத் தொகையை காங்கிரஸ் கட்சி வேட்பாளர் ஈவிகேஎஸ் இளங்கோவனின் தேர்தல் செலவு கணக்கில் சேர்க்க திட்டமிட்டுள்ளனர். இந்த செட்டுகளை அகற்ற வேண்டும். தேர்தல் விதிமுறைகளை மீறி ஆளுங்கட்சியினர் பயன்படுத்தும் வாகனங்களில் உள்ள கொடி மற்றும் சின்னங்களை அகற்ற வேண்டும் உள்ளிட்ட கோரிக்கைகள் முன்வைக்கப்பட்டுள்ளன.
பறக்கும் படை அதிகாரிகள்
இதற்கு பதிலடி கொடுக்கும் வகையில் ஈரோடு கிழக்கு பிரச்சாரக் கூட்டத்தில் திமுக அமைச்சர்
எ.வ.வேலு
பேசியுள்ளார். அதிமுக சார்பில் மாவட்ட தேர்தல் அலுவலர் மற்றும் மாவட்ட ஆட்சியரிடம் ஆளுங்கட்சியினர் தேர்தல் விதிமுறைகளை மீறி செயல்படுவதாக புகார் அளித்தது குறித்து கேள்வி எழுப்புகையில், ஏற்கனவே தேர்தல் ஆணையத்தில் இருந்து இரண்டு அதிகாரிகள் நியமிக்கப்பட்டு அவர்களுக்கு கீழ் உள்ள பறக்கும் படைகள் மூலம் கண்காணிக்கப்பட்டு வருகிறது.
40 பேருக்கு பாஸ்
முறையாக அனுமதி பெற்று இருக்கிறார்களா? என்பது குறித்து ஆய்வு செய்து வருகிறார்கள். அதேபோல் ஏற்கனவே 40 பேருக்கு பாஸ் கொடுத்திருக்கிறார்கள். அவர்கள் தான் கட்சிக் கொடியைக் கட்டிக் கொண்டு செல்கிறார்கள். வேறு யாரும் அப்படி செய்யவில்லை. தோல்வி பயத்தால் தேர்தல் ஆணையத்திற்கு சென்று அதை செய்கிறார்கள், இதை செய்கிறார்கள் என அதிமுக புகார் தெரிவிக்கிறது.
கலங்கும் அதிகாரிகள்
கூட்டணியை கட்சி பொறுத்தவரை அனைவரும் அனுமதி பெற்று தான் தேர்தல் பணியில் ஈடுபட்டு வருகிறார்கள். அவர்கள் புகார் செய்திருந்தால் சம்பந்தப்பட்ட அதிகாரிகள் மீண்டும் ஆய்வு செய்யலாம். முறையாக தேர்தல் நடக்கிறது என்றார். அதிமுக, திமுகவிற்கு இடையில் மாட்டிக் கொண்டு தேர்தல் அதிகாரிகள் தான் விழித்துக் கொண்டிருக்கின்றனர்.
ஆளுங்கட்சிக்கு உறுதுணையாக இல்லாவிட்டாலும் சிக்கல். எதிர்க்கட்சிகள் சொல்வதை காது கொடுத்து கேட்காவிட்டாலும் சிரமம். இவ்வாறு வாக்கு வேட்டை ஒருபுறம், அதிகாரிகள் கலக்கம் மறுபுறம் என ஈரோடு கிழக்கு தேர்தல் களத்தில் அனல் பறந்து கொண்டிருப்பதாக அரசியல் விமர்சகர்கள் கூறுகின்றனர்.