அதிவேக பயணத்திற்கு பெயர் பெற்றது தேஜஸ் ரயில். மேலும் குளிர்சாதன மற்றும் நவீன வசதிகளுடன் இயங்கும் சொகுசு ரயில் என்பதால் தேஜஸ் ரயிலுக்கு அதிக மவுசு உள்ளது. இந்த ரயில் சேவையானது சென்னை – மதுரை இடையே 2019ஆம் ஆண்டு மார்ச் 1ம் தேதி முதல் இயங்கி வருகிறது.
சென்னையில் இருந்து காலை 6 மணிக்கு புறப்படும் ரயில், மதுரையை நண்பகல் 12.15 மணிக்கு அடைகிறது. பிறகு மீண்டும் மதுரையில் இருந்து பிற்பகல் 3 மணிக்கு புறப்படும் ரயில் இரவு 9.30 மணிக்கு சென்னை வந்தடைகிறது. ஏ.சி சேர்கார், பிசினஸ் கிளாஸ், எக்ஸ்கிக்யூட்டிவ் வகுப்பு என 3 வகையான கட்டணம் இதில் வசூலிக்கப்படுகிறது.
மதுரையில் இருந்து சென்னைக்கு ஆறரை மணி நேரத்தில் சென்றடைவதால், ஒரே நாளில் இந்த ரயிலில் சென்று வருபவருக்கு இது மிகுந்த வசதியாக உள்ளது. திருச்சி மற்றும் திண்டுக்கல் ரயில் நிலையங்களில் மட்டுமே இந்த ரயில் நின்று செல்லும். பொதுமக்களிடம் நல்ல வரவேற்பு இருக்கும் இந்த ரயிலானது தாம்பரத்தில் நின்று செல்ல வேண்டும் என்பது பயணிகளின் பலநாள் கோரிக்கையாகக் இருந்து வருகிறது. ஆனால் ரயில்வே வாரியம் அதற்கு செவிசாய்க்கவில்லை.
மேலும் டி.வி, இருக்கை, தூய்மை பணி, போன்றவற்றிற்காக பயணிகளிடம் கூடுதல் கட்டணம் வசூல் செய்தும் இவை எதுவும் முறையாக வழங்கப்படுவது இல்லை என்ற குற்றச்சாட்டும் உள்ளது. அதேபோல் தேஜஸ் ரயிலில் பல மாதங்களாக 20 சதவீதத்துக்கும் மேற்பட்ட இடங்கள் நிரம்பாமல் காலியாக இயக்கப்பட்டது தகவல் அறியும் உரிமைச் சட்டம் மூலம் தெரியவந்தது.
சென்னை சிட்லபாக்கத்தைச் சேர்ந்த தயானந்த கிருஷ்ணன் என்பவர், தகவல் உரிமை சட்டத்தின் கீழ், தேஜஸ் ரயிலில் 2019 முதல் 2022-ம் ஆண்டு ஏப்ரல் வரை மாதந்தோறும் எவ்வளவு இடங்கள் நிரம்பின என்பது உள்ளிட்ட பல கேள்விகளைக் கேட்டிருந்தார்.
தேஜஸ் ரயிலின் எக்ஸிக்யூட்டி சேர் காரில் 56 இடங்களும், ஏசி சேர் காரில் 856 இடங்களும் உள்ளன. கடந்த 2019-ம் ஆண்டு மார்ச்சில் எக்ஸிக்யூட்டி சேர் காரில் 22.69 சதவீதம் இடங்களும், ஏசி சேர் காரில் 41.86 சதவீதம் இடங்களும் காலியாக இயக்கப்பட்டது தெரியவந்தது. 2019-ம் ஆண்டு அக்டோபரில் எக்ஸிக்யூட்டி சேர் காரில் 29.4 சதவீதம் இடங்களும், 2020 மார்ச்சில் 42.26 சதவீதம் இடங்களும், 2021 ஜனவரியில் 50.6 சதவீதம் இடங்களும், 2022-ம் ஆண்டு பிப்ரவரியில் 20.76 சதவீதம் இடங்களும், ஏப்ரலில் 5.63 சதவீதம் இடங்களும் நிரம்பாமல் காலியாக இருந்துள்ளன.
அதேபோல், ஏசி சேர் காரில் 2019 அக்டோபரில் 35.5 சதவீதம் இடங்களும், டிசம்பரில் 21.77 சதவீதம் இடங்களும், 2020 மார்ச்சில் 45.87 சதவீதம் இடங்களும், 2021 ஜனவரியில் 39.69 சதவீதம் இடங்களும், 2022 பிப்ரவரியில் 20.7 சதவீதம் இடங்களும் நிரம்பாமல் காலியாக இருந்தது தெரியவந்துள்ளது.
மறுமார்க்கமாக, சென்னைக்கு இயக்கப்பட்ட தேஜஸ் ரயிலில் பல மாதமாக இடங்கள் நிரம்பாமல் இருந்துள்ளது. இதன்மூலம், ரயில்வேக்கு பெரும் வருவாய் இழப்பு ஏற்பட்டுள்ளது. எனவே, வருவாய் இழப்பை தவிர்ப்பதோடு, தாம்பரம் பகுதி மக்களின் கோரிக்கையை நிறைவேற்றும் வகையில், தாம்பரம் ரயில் நிலையத்தில் தேஜஸ் ரயிலை நிறுத்த ரயில்வே வாரியத்துக்கு 2019 – 2020 காலகட்டத்தில் 6 முறை பரிந்துரைக் கடிதங்களை அதிகாரிகள் அனுப்பினர். அதற்கு ரயில்வே வாரியத்திடம் இருந்து ஒப்புதல் கிடைக்கவில்லை என்பதும் தகவல் உரிமைச்சட்டத்தில் தெரியவந்துள்ளது.
தூத்துக்குடியில் வழக்கறிஞர் கொலை திருநெல்வேலி வழக்கறிஞர்கள் நீதிமன்றத்தை புறக்கணித்து போராட்டம்
இந்தநிலையில் தேஜஸ்வி ரயில் தாம்பரத்தில் நின்று செல்ல வேண்டும் என்ற பயணிகளின் நீண்டநாள் கோரிக்கைக்கு, தற்போது ரயில்வே வாரியம் ஒப்புதல் அளித்துள்ளது. அதன்படி தேஜஸ் ரயில், தாம்பரம் ரயில் நிலையத்தில் பிப்ரவரி 26 முதல் 6 மாதங்களுக்கு சோதனை அடிப்படையில் நின்று செல்ல ரயில்வே வாரியம் அனுமதி அளித்துள்ளது.
இது குறித்து மத்திய இணையமைச்சர் எல்.முருகன் தனது ட்விட்டர் பதிவில், “சென்னைவாசிகளின் நீண்ட நாள் கோரிக்கையான, சென்னையில் இருந்து மதுரைக்கு செல்லக்கூடிய தேஜஸ் விரைவு ரயில் இனி தாம்பரத்தில் நின்று செல்லும். தமிழக மக்களின் சார்பில் கொடுத்த கோரிக்கையை ஏற்று உத்தரவு வழங்கிய மாண்புமிகு மத்திய ரயில்வே அமைச்சர் அஸ்வினி வைஷ்ணவ் ஜி அவர்களுக்கு மிக்க நன்றி..!’’ என அவர் தெரிவித்துள்ளார்.